Աղբիւր՝ www.armenianorthodoxchurch.org
Չորեքշաբթի՝ 11 յունիս 2014-ին, Վեհափառ Հայրապետը յատուկ պատգամ ուղղեց Սիրիայում մարդկային իրաւանց բռնաբարումները քննելու կոչւած միջազգային յանձնախմբի նախագահ՝ Դկտ. Փաւլօ Սերժիօ Փինհէյրոյին։ Իր պատգամում Վեհափառը պահանջեց, որ Քէսաբի հարցը յատուկ քննութեան առարկայ դառնայ՝ նկատի ունենալով Թուրքիայի բացասական դերը այս գծով։ Վեհափառը յատկապէս ասաց. «Երբ հայ ժողովուրդը պատրաստւում է Օսմանեան թուրք պետութեան կողմից իր դէմ գործադրւած ցեղասպանութեան 100-ամեակը նշելու, մի այլ ողբերգութիւն պարտադրւեց մեր ժողովրդին Թուրքիայի կողմից։ Արդարեւ, Քէսաբի մեր ժողովուրդը, որ տեղահան էր դարձել պատմական Կիլիկիայից, ահա դարձեալ նո՛յն ողբերգութեան ենթարկւեց«։ Ապա Վեհափառն առաջարկեց անհրաժեշտութեան պարագային իր ներկայացուցչին ուղարկել իր մօտ ճշգրիտ՝ տեղեկութիւններ փոխանցելու Քէսաբի հարցի մասին։
Յիշեալ յանձնախումբը նշանակւել է Միացեալ ազգերի կազմակերպութեան Մարդկային իրաւանց յանձնաժողովի կողմից եւ ներկայ ամսւայ աւարտին նա իր տեղեկագիրը կը ներկայացնի Ապահովական խորհրդին։
Յայտնենք, որ վերջերս Վատիկան կատարած Վեհափառ Հայրապետի այցելութեան ընթացքում, Սիրիայի հայութեան տագնապը, քրիստոնեայ համայնքների դիմագրաւած դժւարութիւնների շրջանակում, յաճախակի կերպով արծարծւեցին՝ Պապի, պետական քարտուղարին եւ մամլոյ ներկայացուցիչների հետ տեղի ունեցած հանդիպումների ընթացքում։