Աղբիւր՝ www.yerkirmedia.am
Պոլսոյ Հայոց պատրիարքարանը վերջին օրերի ընթացքում Թուրքիայում շարունակուող ահաբեկչական գործողութիւնները դատապարտող յայտարարութիւն է տարածել` յորդորելով զերծ մնալ Թուրքիայի հայ համայնքին թիրախաւոեւող յայտարարութիւններից ու հրապարակումներից:
Ինչպէս հաղորդում է «Արմէնպրես»-ը` վկայակոչելով թուրքական «Անադոլու» գործակալութիւնը, յայտարարութեան մէջ պատրիարքարանից յայտնել են, որ իրենք աղօթում են Թուրքիայի միասնականութեանն ու ամբողջականութեանը վնասող ահաբեկչական դէպքերին վերջ տալու եւ տեւական խաղաղութեան հաստատման համար:
Պոլսոյ Հայոց պատրիարքարանն իր մտահոգութիւնն է յայտնել այն փաստի առնչութեամբ, որ շատ յաճախ թուրքական ԶԼՄ-ներում տեղ են գտնում տարբեր յօդուածներ, որոնք թիրախաւորում են Թուրքիայի հայ համայնքին:
«Ժամանակ առ ժամանակ որոշ գրողների` մեր համայնքին թիրախաւորող եւ այն ահաբեկչական խմբաւորման հետ նոյնականացնող արտայայտութիւնները խորապէս վիրաւորում են այս հայրենիքին մշտապէս հաւատարիմ եւ քաղաքացիական գիտակցութիւն ունեցող հայ քաղաքացիներին: Իրենց Թուրքիայի մի մասը համարող հայ քաղաքացիների դէմ անարդար արտայայտութիւններ օգտագործելը բարեգթութեան մէջ չտեղաւորուող վերաբերմունք է: Վստահ ենք, որ մեր ազգի մեծամասնութիւնը համակարծիք չէ այս օտարեցնող արտայայտութիւններին»,- ասւում է յայտարարութեան մէջ:
Պատրիարքարանը խստօրէն դատապարտել է ցանկացած տեսակի ահաբեկչական գործողութիւնները երկրում` իր վշտակցութիւնը յայտնելով բոլոր այն ընտանիքներին, ովքեր այս օրերի ընթացքում կորուստներ են ունեցել: