Աղբիւր՝ www.armenianorthodoxchurch.org

Հինգշաբթի, 23 յունւարին, նախագահութեամբ Ն.Ս.Օ.Տ.Տ. Արամ Ա Կաթողիկոսի, Ազգային կետրրոնական վարչութեան Կրօնական ժողովն ունեցաւ իր լիակատար նիստը: Կրօնական ժողովը բաղկանում է 13 անդամներից՝ վանաբնակ միաբաններից ու թեմակալ առաջնորդներից:

Առաջին հերթին, Կրօնական ժողովն ընդհանուր ակնարկով քննեց Ազգային ընդհանուր ժողովից յետոյ յառաջիկայ չորս տարիների համար պատրաստւած Կրօնական ժողովի ուղեցոյցը, կատարելով անհրաժեշտ յստակեցումներն ու շեշտաւորումները: Ապա, յաջորդաբար քննարկեց օրակարգի գլխաւոր հարցերը.- Քրիստոնէական դաստիարակութիւն, Կիրակնօրեայ վարժարաններ, կրօնական հրատարակութիւններ, երիտասարդութեան յատուկ ծրագրեր ու աշխատանքներ, միջ-եկեղեցական եւ միջ-կրօնական յարաբերութիւն, Հայ եկեղեցու բարեկարգում (Եպիսկոպոսաց ժողով, Ծիսական ու Սրբադասման յանձնախումբերի աշխատանքներ), Դպրեվանք, միաբանական ընդհանուր ժողով ապրիլին, Հայ եկեղեցու համալսարանական ուսանորղների միութիւն (ՀԵՀՈՄ), Հայ համալսարանաւարտների միութիւն, թեմերից եկած հարցեր ու առաջարկներ: Յիշեալ իւրաքանչիւր նիւթի մասին առանձին զեկոյցներ տրւեցին եւ քննարկումներ կատարւեցին: Յատուկ կարեւորութեամբ անդրադարձ եղաւ քրիստոնէական դաստիարակութեան ու երիտասարդութեան առնչւած ծրագրերին:

Վեհափառ Հայրապետը միօրեայ ժողովի աւարտին եզրակացնելով կրօնական մարզին առնչւած Կաթողիկոսութեան աշխատանքները՝ ասաց. «Ճի՛շտ է, որ Կրօնական ժողովը զանազան ծրագիրներ է մշակում՝ եկեղեցու կեանքին ու առաքելութեանն առնչւած եւ տարբեր բնագաւառների հետ կապ ունեցող, սակայն դրանք մաս են կազմում մէկ ամբողջութեան: Ա՛յս հայեցակէտով անհրաժեշտ է մօտենալ եկեղեցու առաքելութեանն ու ծառայութեանը: Բոլոր աշխատանքներն ու ծրագրերն առաջնահերթութիւն են. սակայն դրանցից իւրաքանչիւրի շեշտաւորումը կապ ունի տեղական պայմանների եւ մեր ժողովրդի կարիքների հետ: Օրինակ, առաջնահերթ կարեւորութիւն պէտք է ընծայւի այսօր մեր երիտասարդութիւնը եկեղեցուն մօտեցնելու, եւ՝ եկեղեցին դէպի երիտասարդութիւնն առաջնորդելու աշխատանքին: Երիտասարդութիւնն այսօր տարբեր մտածումներ, մտահոգութիւններ ու մօտեցումներ ունի, որովհետեւ տարբեր աշխարհի մէջ է ապրում: Եկեղեցին պէտք է համապատասխան մօտեցում որդեգրի: Նո՛յնը կարելի է ասել քրիստոնէական դաստիարակութեան մասին: Անհրաժեշտ է աւանդական ու դասական մեթոտներից հեռու մնալ եւ տարբեր ձեւերով մօտենալ այսօրւայ մարդուն, մանկանը թէ երէցին, որովհետեւ նրանք համաշխարհայնացման հետեւանքները են ապրում իրենց ամենօրեայ կեանքում: Հետեւաբար, անհրաժեշտ է որ մեր եկեղեցին լուրջ վերատեսութեան ենթարկի իր առաքելութիւնը՝ իր բոլոր երեսներով»: