Աղբիւր՝ www.asbarez.com

Քեսապում կեանքն աստիճանաբար բարելաււում է, ենթակառուցւածքներն աւելի լաւ են գործում, սակայն տակաւին երկար ուղի ունենք մեր դիմաց։

«Արմէնփրես»-ի հետ ունեցած զրոյցին ընթացքում այս մասին յայտնել է քեսապահայ Կարօ Մանճիկեանը՝ աւելացնելով, որ Քեսապին տրամադրւած օժանդակութիւնները հերթականութեամբ բաժանւում են շրջանի բնակիչներին։

Նրա համաձայն, արդէն 2 անգամ դրամական օժանդակութիւններ են բաժանւել քեսապցիներին, իսկ Սիրիայի Կարմիր մահիկ կազմակերպութիւնը տարբեր տեսակի մթերքներ է բաժանել բնակիչներին: «Տրամադրւած գումարներով գնել են ջրի ամբարներ, որոնք գողացւել էին, նաեւ գնւել են բոյսերը դեղելու մղիչ սարքեր, որոնք բնակիչներն իրար միջեւ փոխանակում են»,- նշել է Մանճիկեանը՝ աւելացնելով, որ սիրիական իշխանութիւնները մինչեւ ձմեռ բոյսերը դեղելու համար նախատեսւած քարշակներ են տրամադրել:

Կարօ Մանճիկեանը նաեւ տեղեկացրել է, որ մօտիկ ապագային տրամադրւելու են նաեւ միւս օժանդակութիւնները: