Աղբիւր՝ www.yerkirmedia.am

Շատ շուտով հայ գրողների գրքերը հասանելի կը լինեն եւրոպական մի շարք երկրներում, նաեւ՝ Թուրքիայում: "Հայ գրականութեան հիմնադրամը"՝ Եւրամիութեան հետ համատեղ, մի հետաքրքիր ծրագիր է իրականացնում՝ "Գրքի հարթակ" խորագրով:

Ծրագրի շրջանակում Հայաստանում են երեք հրատարակիչներ՝ Գերմանիայից, Շւեդիայից ու Մակեդոնիայից, եւ երեք գրական գործակալներ՝ Թուրքիայից, Ֆրանսիայից ու Իտալիայից:

Նրանք հանդիպելու են Հայաստանի հրատարակիչների հետ, ծանօթանալու են հայ գրողների ստեղծագործութիւններին եւ հաւանութեան դէպքում փոխանակւելու են հեղինակային իրաւունքով: Սա նշանակում է, որ ասենք, թուրք հրատարակիչը որեւէ հայ գրողի ստեղծագործութիւն թուրքերէն թարգմանելու եւ իր երկրում վաճառելու իրաւունք է ձեռք բերելու:

Թե գրական ի՞նչ պաշարով հետ կը վերադառնան մեզ հիւր եկած հրատարակիչներն ու գործակալները, դեռ յայտնի չէ: Անակնկալ է սպասում նաեւ հայ ընթերցողին: 

"Առաջին անգամ եմ Հայաստանում: Բաւականին շատ մասնագէտների ենք հանդիպել այս ոլորտից, այդ թւում՝ հրատարակիչներ, գրական գործակալներ, գրողներ: Կարծում եմ հայ գրականութիւնն արժանի է ներկայացւելու ոչ միայն Գերմանիայում, այլեւ եւրոպական երկրներում: Գրողներից մէկն, ում ստեղծագործութիւններով հետաքրքրւել եմ Արամ Պաչեանն է",- ասաց Գերմանիայից հրատարակիչ Պիեռօ Սալաբեն:

Ի դէպ, "Գրքի հարթակ" ծրագրի հիւրերն այսօր այցելել են Ծիծեռնակաբերդ եւ ծաղիկներ դրել Եղեռնի զոհերի յուշահամալիրում։