Աղբիւր՝ www.yerakouyn.com

Ռուանտայի խորհրդարանի պատգամաւոր Մուսապէյեզու Նարցիսը կը կարծէ, որ միջազգային հանրութեան կողմէ իւրաքանչիւր ցեղասպանութեան ճանաչում արդէն կը նշանակէ երեւոյթը ընդունիլ որպէս համաշխարհային յանցագործութիւն:

«Երբ Ռուանտայի մէջ տեղի ունեցաւ ցեղասպանութիւն, միջազգային հանրութիւնը կրնար զայն կանգնեցնել, սակայն չըրաւ, իսկ երբ միջազգային հանրութիւնը կ՛ընդունի որեւէ ցեղասպանութիւն, ատիկա կը նշանակէ, որ անոնք այժմ կը մտածեն այլ կերպով, ոչ այնպէս ինչպէս առաջ: Սա կը նշանակէ, որ այդ ցեղասպանութիւնը ոչ միայն այդ երկրին ու ժողովրդին է, այլեւ ամբողջ աշխարհին, այսինքն` ատիկա համաշխարհային յանցագործութիւն է»,- ­ «Արմենփրես»-ի հետ զրոյցի ընթացքին ընդգծած է պատգամաւորը:

Յունիս 2–ին Գերմանիոյ Պունտեսթակը ընդունեց Հայոց ցեղասպանութեան ճանաչման բանաձեւը, որ ունի «1915 եւ 1916 թթ. հայերու եւ միւս քրիստոնեայ փոքրամասնութիւններու ցեղասպանութեան յիշատակին եւ ոգեկոչման մասին» անուանումը: Բանաձեւը ընդունուեցաւ ունենալով ընդամէնը մէկ դէմ, մէկ ձեռնպահ ձայն: