Աղբիւր՝ www.yerkirmedia.am

The New York Times պարբերականն անդրադարձել է Հայոց ցեղասպանութեանը: «Դարը՝ Հայոց ցեղասպանութիւնից յետոյ. Թուրքիան աւելի կտրուկ է ժխտում» վերնագրով յօդուածը հեղինակել է Թիմ Արանգոն։

Նա զրուցել է Դիարբեքիրում բնակուող Վահիտ Սահինի եւ Գաֆուր Թուրքայի հետ, որոնց նախնիները վերապրել են Ցեղասպանութիւնը:

«Նրանք բոլոր տղամարդկանց նետեցին այս փոսը (տե՛ս նկարում-խմբ)»,- պատմել է 78-ամեայ Վահիտ Սահինը` սերնդից սերունդ անցած պատմութիւնը, այնուհետեւ ցոյց տալով վանքի կողմը` յաւելում. «Մի կողմը հայերինն էր, միւսը` մահմեդականներինը: Սկզբում նրանք իսկապէս հաշտ էին իրար հետ»:

Յօդուածի հեղինակի միւս զրուցակիցը՝ Գաֆուր Թուրքայը յիշում է իր պապի պատմութիւնը, որին յաջողուել է մանուկ հասակում փրկուել Ցեղասպանութիւնից: Նրան որդեգրել է մահմեդական մի ընտանիք: Վերջերս, տեղեկանալով իր նախնիների անցեալի մասին, Թուրքայն ընդունել է քրիստոնէութիւն եւ այժմ իրեն հայ է համարում:

Յօդուածին կից հեղինակը ներկայացնում է ժամանակակից Թուրքիայում արուած լուսանկարներ, որոնք փաստում են նրա զրուցակիցների պատմութեան իսկութիւնը։