Աղբիւր՝ www.yerkirmedia.am
Կահիրէում տեղի է ունեցել հանդիպում Ն.Ս.Օ.Տ.Տ. Արամ Ա Կաթողիկոսի, ղպտի եկեղեցու հոգեւոր պետ Նորին Սրբութիւն Թաւատրոս Բ. Պատրիարքի եւ ասորի ուղղափառ եկեղեցու հոգեւոր պետ Նորին Սրբութիւն Աֆրամ Բ. Պատրիարքի միջեւ: Հանդիպումը մասն էր շուրջ քսան տարի առաջ Միջին Արեւելքում իրենց կենտրոնը ունեցող Արեւելեան Ուղղափառ «Ոչ-Քաղկեդոնական» քոյր եկեղեցիների հոգեւոր պետերի համախմբման։ Այս մասին «Արմէնպրես»-ը տեղեկացաւ Կիլիկիոյ Կաթողիկոսութեան պաշտօնական կայքից:
Վեհափառ Հայրապետի նախաձեռնութեամբ ստեղծուած կառոյցի նպատակն է Միջին Արեւելքում գործակցութիւն ծաւալել հայ, ասորի եւ ղպտի եկեղեցիների միջեւ:
Միջեկեղեցական գործակցութեան կազմակերպչական հարցերի համար կազմուել է գործադիր յանձնախումբ, ինչպէս նաեւ ենթահաձնախմբեր: Մեծի Տանն Կաթողիկոսութեան կողմից գործադիր յանձնախմբին մասնակցել են Թեհրանի Հայոց Թեմի Առաջնորդ Գերշ. Տ. Սեպուհ Արք. Սարգիսեանը եւ Կաթողիկոսարանի միջեկեղեցական յարաբերութիւնների վարիչ Գերպ. Տ. Յուսիկ Ծ. Վրդ. Մարտիրոսեանը։ Գործադիր յանձնախումբը զեկոյց է ներկայացրել հոգեւոր պետերին, որից յետոյ նրանք յայտարարութեամբ են հանդէս եկել։
Յայտարարութիւնն անդարդառնում է Միջին Արեւելքի ընդհանուր վիճակին, դատապարտում է ծայրահեղական շարժումների գործողութիւններն անմեղ մարդկանց ու, յատկապէս, քրիստոնեայ համայնքների նկատմամբ, շեշտւում է իսլամ-քրիստոնեայ համակեցութեան կարեւորութիւնը՝ փոխադարձ յանգանքի ու վստահութեան վրայ հիմնուած, ինչպէս նաեւ շեշտւում է արեւելեան ուղղափառ եկեղեցիների ներքին միասնականութիւնն ամրապնդելու կարեւորութիւնը: Հոգեւոր պետերը յայտարարութեան մէջ ողջունել են արեւելեան քոյր եկեղեցիների աստուածաբանական երկխօսութիւնը կաթոլիկ, անգլիկան ու ուղղափառ եկեղեցիների հետ եւ ընդհանրապէս միջեկեղեցական շարժման մասնակից դառնալը, նաեւ նշուել է Միջին Արեւելքի հոգեւոր պետերի հանդիպման կարեւորութիւնը՝ նկատի առնելով տարածաշրջանում ստեղծուած իրավիճակը:
Յայտարարութիւնը նաեւ անդրադարձել է Հայոց Ցեղասպանութեան 100-ամեայ տարելիցին եւ մէկ ու կէս միլիոն հայ նահատակների սրբացմանը, կոչ է ուղղուել եկեղեցիներին իրենց մասնակացութիւնը բերել յիշեալ կարեւոր իրադարձութիւններին: