Աղբիւր՝ www.yerkirmedia.am

Հեռախօսազրոյց են ունեցել Ռուսաստանի եւ Թուրքիայի նախագահները: Վլադիմիր Պուտինի պաշտօնական կայքը հաստատում է տեղեկութիւնը, մինչդեռ այդ զրոյցի մասին հաղորդագրութիւն Ռեջեփ Էրդողանի կայքի թէ՛ թուրքալեզու, եւ թէ՛ անգլալեզու տարբերակում մեզ չյաջողուեց գտնել:

Կրեմլի համաձայն՝ հեռախօսազրոյցը նախաձեռնել է թուրքական կողմը: Նախագահներն, ըստ նոյն աղբիւրի՝ բարեկամաբար քննարկել են երկկողմ համագործակցութեան հարցեր, այդ թւում՝ «Թուրքական հոսք» գազատարի կառուցման վերաբերեալ: Կարծիքներ են փոխանակել միջազգային եւ տարածաշրջանային օրակարգային հարցերի շուրջ:

Թուրքական լրատուամիջոցներն՝ առանց բացայայտելու իրենց աղբիւրները, պնդում են, թէ Էրդողանը հեռախօսազրոյցում անդրադարձել է նաեւ, իրենց բնորոշմամբ՝ «1915թ. դէպքերին»: Թուրքիայի նախագահն իբր Պուտինին ասել է, թէ Անկարան նախընտրում է, որ «պատմական այս թեման» արդար տեսանկիւնից դիտարկուի:

«Թըրքիշ ուիքլիի» համաձայն՝ Էրդողանը նաեւ նշել է, թէ Հայաստանն անտեսում է խաղաղութեան կոչերը, եւ հետաքրքուած չէ պատմութիւնն ուսումնասիրելու համար համատեղ յանձնաժողով ստեղծելու՝ Թուրքիայի առաջարկով:

Կրկին շեշտենք՝ այս մասին Էրդողանի կայքում ոչինչ չի ասւում: