Աղբիւր՝ www.asbarez.com

Մարդկային Իրաւունքների Եւրոպական Ատեանը երեքշաբթի՝ դեկտեմբերի 17-ին բաւարարել է Թուրքիոյ Աշխատաւորական Կուսակցութեան նախագահ Տողու Փերինչեքի հայցը, որով նա Զւիցերիոյ արդարադատութեանը մեղադրել էր իր խօսքի ազատութիւնը սահմանափակելու յանցանքով:

Ըստ «Հիւռռիէթ»-ի կայքի, ատեանի որոշումով Փերինչեքի կողմից Հայոց Ցեղասպանութեան ուրացումը եւ այն «միջազգային սուտ» նկատելու արարքը խօսքի ազատութեան դրսեւորում է:

Թուրք քաղաքական գործիչը բազմիցս, ներառեալ՝ Զւիցերիայում կայացած գիտաժողովների եւ այլ հաւաքների ընթացքում, հրապարակաւ հերքել է Օսմանեան Կայսրութեան կողմից իրականացւած Հայոց Ցեղասպանութեան իրողութիւնը:

Զւիցերիական մի ատեան Փերինչեքին մեղաւոր էր նկատել՝ իր յայտարարութիւններով ազգային խտրականութիւն դրսեւորելու յանցանքով: «Ցեղասպանութիւնը յստակօրէն սահմանւած, իրաւական եւ դժւար ապացուցելի մի հասկացութիւն է», նշւել է Մարդկային Իրաւունքների Եւրոպական Ատեանի նշեալ վճիռում:

ՀՅԴ Բիւրոյի Հայ Դատի եւ քաղաքական հարցերի գրասենեակը հակադարձել է Ցեղասպանութեան ուրացումը խօսքի ազատութեան դրսեւորում նկատող Մարդկային Իրաւանց Եւրոպական Ատեանի 17 դեկտեմբերի վճռին:

«Մարդու Իրաւունքների Եւրոպական Դատարանի 17 դեկտեմբերի վճիռը դատապարտելի է, որովհետեւ դուռ է բացում ատելութեան տարածման առջեւ՝ «կարծիքի ազատութեան» քօղի տակ, եւ կարելի է ինքնին համարել Հայոց Ցեղասպանութեան ժխտողականութեան տխրահռչակ մի օրինակ: Այն փաստը, որ դատակազմը միաձայնութեամբ չի ընդունել որոշումը, հաստատում է, թէ իրաւականօրէն տեղ կայ առաջ շարժւելու՝ փոխելու համար այս վճիռը: Անհրաժեշտ է լարել մեր ուժերը այդ ուղղութեամբ»,- նշւել է գրասենեակի յայտարարութեան մէջ: