Աղբիւր՝ www.yerkirmedia.am
Armeniangenocide100.org-ը Հայոց ցեղասպանութեան 100-րդ տարելիցի միջոցառումների պաշտօնական կայքի հասցէն է: Այն ստեղծուել է պետական յանձնաժողովի որոշմամբ:
Այսօրուանից (30.01.2015) գործող կայքում կայ 5 խորագիր, որոնցից իւրաքանչիւրը բաղկացած է մի քանի ենթաբաժիններից: Այդ խորագրերի միջոցով անդրադարձ է կատարւում Հայոց ցեղասպանութեանը՝ պատմական, մշակութային տեսանկիւններից, ներկայացւում են ժամանակագրական տուեալներ, տեղեկութիւններ Հայոց ցեղասպանութիւնը ճանաչած պետութիւնների, կազմակերպութունների մասին: Առանձին բաժնով մէջբերուած են մի շարք յայտնի անձանց վկայութիւնները Հայոց ցեղասպանութեան մասին:
Armeniangenocide100.org կայքում գործում է նաեւ «Պատմի՛ր քո պատմութիւնը» բաժինը, որում ցանկացած մարդ կարող է ներկայացնել Հայոց ցեղասպանութեան ականատեսների՝ իրենց յայտնի պատմութիւնները: Կայքում արդէն իսկ կարելի է կարդալ մի քանի այդպիսի պատմութիւն: Բացի ընթացիկ միջոցառումների եւ ծրագրերի մասին ծանուցումներից, թարմացւում են նաեւ 100-րդ տարելիցի վերաբերեալ միջազգային եւ հայկական մամուլում անդրադարձները:
«Ճանաչում» բաժնում պահանջագիր է հրապարակուած, որը նախատեսուած է այն երկրների քաղաքացիների համար, որոնք չեն ճանաչել Ցեղասպանութիւնը։ Առցանց այն ստորագրելով` այդ երկրների քաղաքացիները կոչով դիմում են իրենց երկրի իշխանութիւններին` ճանաչելու եւ դատապարտելու ոճիրը։
«Այս օրը 100 տարի առաջ» բաժնում զետեղուելու են մէկ դար առաջ մամուլում տեղ գտած արձագանքները: Իսկ «Գրադարան» բաժնում տեղադրուած են Ցեղասպանութեան մասին ֆօտօ եւ վիդէօ արխիւներ, գրքեր, տեսային նիւթեր:
Armeniangenocide100.org կայքը եռալեզու է՝ առկայ են հայերէն, անգլերէն եւ ռուսերէն տարբերակները: