Աղբիւր՝ www.aztagdaily.com

«Մարմարա»-ն հաղորդում է, որ Թուրքիայի Եւրոպական միութեան հարցերով նախարար ու աւագ բանագնաց Վոլքան Պոզքըրը չորեքշաբթի օրը խօսք է արտասանել Ֆրանսիայի խորհրդարանի Եւրոպական միութեան յանձնախմբի առջեւ: Պատասխանելով Հայոց ցեղասպանութեան մասին մի հարցումն, Պոզքըրա ասել է, որ Անգարայի իշխանութիւնները չեն ուզում, որ քաղաքական գործիչները «1915-ի դէպքերի» վերաբերեալ որոշումներ տան: Պոզքըրը ներկաների ուշադրութեանն է յանձնել «պատմաբանների յանձնախումբ» ստեղծելու Թուրքիայի առաջարկը` պատրաստակամութիւն յայտնելով ընդունելու այդ յանձնախմբի որեւէ եզրակացութիւնը:

«Հաբերլեր» կայքը գրել է, որ Պոզքըրը պնդել է, որ Թուրքիան իր պատմութեան մէջ ամօթալի էջ չունի:

Ֆրանսիայի խորհրդարանի երեսփոխան Վալերի Բուայէն ներկայացրել է ցեղասպանութիւններն ու մարդկութեան դէմ յանցագործութիւններն ուրացողներին պատժելու մասին նոր մի օրինագիծ, որ մինչեւ հիմա ապահովել է աւելի քան 40 երեսփոխանների ստորագրութիւնը: