Աղբիւր՝ www.asbarez.com
Յունաստանի խորհրդարանի կողմից քննարկւող ցեղապաշտութեան դէմ օրինագծի նոր տարբերակը խորհրդարան ներկայացւեց երեքշաբթի՝ սեպտեմբերի 2-ին եւ կարող է քւէարկութեան դրւել սեպտեմբերի 5-ին։
Նոր տարբերակի մէջ, քրէական յանցագործութիւն է նկատւելու նաեւ Հայոց ցեղասպանութեան հերքումը։
Առաջին հերթին, օրինագծի նոր տարբերակին ի նպաստ քւէարկել են Նոր հանրապետութիւն, «Փասօք» ու «Դիմար» կուսակցութիւնները, մինչ նրա դէմ քւէարկել են «Անկախ յոյներ»-ը եւ «Ոսկեայ արշալոյս»-ը: «Սիրիզա» խմբակցութիւնը ձեռնպահ է մնացել՝ յայտնելով սակայն, որ կարող է թեր քւէարկել, եթէ օրինագծի մէջ կատարւեն իր առաջարկած փոփոխութիւնները:
Արդարադատութեան նախարար Խարալամպոս Աթանասիուն, ներկայացնելով օրինագիծը՝ ասել է, որ այն յոյն հասարակութիւնն ու ժողովրդավարութիւնը օտարատեացութեան, անհանդուրժողականութեան ու խտրականութեան երեւոյթներից պաշտպանող մի օրէնք է:
Խորհրդարանի 101 պատգամաւորներից 51-ի քւէն հարկաւոր է օրինագիծը վաւերացնելու համար: «Ազատ Օր»-ի գլխաւոր խմբագիր Հռիփսիմէ Յարութիւնեանն ասել է, որ սկզբնական շրջանում քննւում էր օրինագիծը աշնանային նստաշրջան տեղափոխելու հարցը, սակայն խորհրդարանի մէջ տեղի ունեցած աշխոյժ քննարկումների շնորհիւ՝ ընդունւել է օրինագծի նոր մշակւած տարբերակը:
Յարութիւնեանի գնահատումով՝ հայ համայնքի հետ հանդիպումներից պարզւել է, որ խորհրդարանի մեծամասնութիւնը կողմ է օրէնքին:
«Դեռ վստահ չենք, բայց հաւանաբար Հայոց ցեղասպանութեան ուրացումը քրէականացւելու է»,- «Ազատութիւն» կայանին ասել է Յունաստանի Հայ դատի յանձնախմբի ատենապետ Յակոբ Աւագեանը: «Կարծում եմ, որ ուրբաթ օրը ուրախ լուր կը ստանանք Յունաստանից»,- աւելացրել է նա:
Միւս կողմից, Հ.Յ.Դ.-ի Յունաստանի Հայ դատի յանձնախմբի նախաձեռնութեամբ, շաբաթ՝ օգոստոսի 30-ին տեղի է ունեցել Համապոնտական միութեան Հարաւային Յունաստանի վարչութեան հետ մի հանդիպում, որին ներկայ են գտնւել Հ.Յ.Դ.-ի Յունաստանի Կենտրոնական կոմիտէի եւ Հայ դատի յանձնախմբի անդամներ Քերոբ Էքիզեանը, Յակոբ Աւագեանը, Յարութիւն Սերոբեանը եւ Սթաւրոս Ապարեանը: Երկու կողմերին հետաքրքրող նիւթը հանդիսանում էր նշեալ օրինագիծը: Երկուստեք շեշտւեց, որ օրինագիծը պէտք է յստակօրէն նշում կատարի խորհրդարանի կողմից ճանաչւած ցեղասպանութիւններին՝ արգելելով նրանց ուրացումը։ Նշենք, որ Յունաստանի խորհրդարանը 1996-ին ճանաչել է Հայոց ցեղասպանութիւնը։
Նաեւ, որոշւեց բոլոր կազմակերպութիւնների ստորագրութիւնները կրող միացեալ մի նամակ խմբագրել եւ ուղարկել երեսփոխաններին ու կառավարութեանը՝ պահանջելով օրինագծի մէջ անպայմանօրէն ներառել ցեղասպանութիւնների հերքումը քրէականացնելու վերաբերեալ յօդւածը: