Աղբիւր՝ www.asbarez.com

ՈՒԱՇԻՆԿԹՈՆ.- Ամերիկայի Հայ Դատի յանձնախումբը տեղեկացնում է, թէ այս շաբթւայ ընթացքին մի վկայութիւն է յանձնել Քոնկրեսի Եւրոպայի ապահովութեան եւ համագործակցութեան յանձնաժողովին (Հելսինքիի յանձնաժողով), իր մտահոգութիւնները յայտնելով Բաքւի հովանաւորութեամբ շարունակւող անհանդուրժողականութեան ստեղծած վտանգների, հակահայ քայլերի եւ սահմանային յարձակումների կապակցութեամբ:

Հայ Դատի յանձնախմբի պետական հարցերի վարիչ Քէյթ Նահապետեանը ահազանգել է, որ Բաքւի քաղաքականութիւնն ու գործողութիւնները խախտում են մարդկային իրաւունքների միջազգային սկզբունքները, անտեսում են Ադրբեջանի կնքած ապահովական պարտաւորութիւնները, ապակայունացնում են տարածաշրջանը եւ ստեղծում են վտանգաւոր միջավայր, որ կարող է լայնածաւալ բռնարարքների վերսկսման առաջնորդել:

Նահապետեանն ընդգծել է, որ այլեւս չի կարելի անտեսել Ադրբեջանի կողմից իրականացւող հակահայ, ապակառուցողական եւ ատելութեան վրայ հիմնւած քաղաքականութիւնը: «Ո՛չ Միացեալ Նահանգների կառավարութիւնը եւ ոչ էլ ԵԱՀԿի մեր գործընկերները չպէտք է որեւէ ձեւով լուռ մնան Բաքւի հակահայ քաղաքականութեան կամ Լեռնային Ղարաբաղի ժողովուրդն ու կառավարութիւնը բռնատիրական կարգերի ենթարկելու միտող ճնշումների դիմաց»,- նշել է Նահապետեանը:

Վկայութիւնն ամբողջութեամբ կարելի է կարդալ՝ այցելելով www.anca.org կայքէջը: