Աղբիւր՝ www.yerkirmedia.am

Նախագահ Սերժ Սարգսեանի շնորհաւորական ուղերձը Ամանորի եւ Սուրբ Ծննդեան տօների առթիւ

«Հայաստանի Հանրապետութեան յարգարժա′ն քաղաքացիներ,

Սիրելի′ հայրենակիցներ,

2017 թւականին հրաժեշտ տալուց րոպէներ առաջ ուզում եմ շնորհակալութիւն յայտնել ձեզ: Երախտապարտ եմ Հայաստանի զինւորին ու շինականին, մտաւորականին ու գործարարին, բոլոր-բոլորին` անձնուրաց աշխատանքի, հայրենասիրութեան եւ համբերութեան համար: Այն հաւատը, որ մենք բոլորս ունենք մեր ժողովրդի եւ երկրի ապագայի հանդէպ, թող մեզ ուժ տա նաեւ նոր տարում:

Այս պահին ընտանիքներով հաւաքւել ենք տօնական սեղանների շուրջ: Բոլորս մտովի ամփոփում ենք անցնող տարին, գոհութիւն յայտնում Աստծուն: Բարեկամութեան եւ հարազատութեան դրական լիցքերով եկէք դիմաւորենք 2018 թւականը:

2017 թւականը հետեւողական աշխատանքի եւ լուրջ ծրագրերի իրագործման տարի էր: Լայնածաւալ փոփոխութիւնների տեմպը չի նւազել. աւելին` դրանք աւելի մեծ վճռականութեամբ ենք առաջ մղել: Այն դրական արդիւնքները, որ մենք այս տարի ունեցանք, առաջին հերթին ձե′ր ձեռքբերումներն են: Եւ դեռ համատեղ շատ անելիքներ ունենք, որպէսզի ամրապնդենք Հայաստանի պետականութեան եւ հասարակութեան հիմքերը:

Մեր յաւակնութիւնները մեծ են, եւ մենք հետեւողական ենք լինելու դրանք իրականացնելիս: Շարունակելու ենք անշեղօրէն պաշտպանել Արցախի իրաւունքները եւ շահերը: Իշխանութիւնների աշխատանքը պէտք է զգալի եւ շօշափելի լինի Հայաստանի իւրաքանչիւր քաղաքացու համար, պէտք է բոլորիս վստահութեան զգացում հաղորդի: Մենք հրաշալի երկիր ունենք, եւ պէտք է հպարտ լինենք այսպիսի երկրի քաղաքացի լինելու հանգամանքով:

Սիրելի՛ հայրենակիցնէր,

2017 թւականին ընտրեցինք նոր Ազգային ժողով: Քաղաքական մրցապայքարը թէժ էր, սակայն մթնոլորտը կառուցողական էր: Խուսափեցինք թշնամանքից եւ հակադիր ճամբարների բաժան-բաժան լինելուց: Դա աւելի կարեւոր է, քան այն, թէ ով քանի տոկոս հաւաքեց: Սա եւս մէկ առողջ միտում է, որն անցնող տարուց պէտք է տեղափոխենք նոր տարի: Փոխադարձ յարգանքը, հանդուրժողականութիւնը եւ համերաշխութիւնը այսուհետ պէտք է լինեն Հայաստանի քաղաքական կեանքի մշտական ուղեցոյցները:

Գալիք տարի աւարտին կը հասցնենք կառավարման նոր կարգի անցնելու մեր աշխատանքները: Ուշագրաւ զուգադիպութեամբ 2018 թւականին տօնելու ենք Հայաստանի Հանրապետութեան հիմնադրման 100-րդ տարեդարձը: Վստահութեամբ կարող ենք պնդել, որ այս յոբելեանին մօտենում ենք աւելի ամուր եւ կայացած պետական-հասարակական կառոյցներով:

Միասին Հայաստան ենք վերադարձնելու երկրից հեռացած մեր հարազատներին: Նրանք գալու են, քանի որ Հայաստան հայրենիքում աշխատելու եւ իրենց դրսեւորելու աւելի մեծ ասպարէզ են տեսնելու: Մեր աշխատանքի նպատակը մէկն է` բացել նոր հորիզոններ եւ հնարաւորութիւններ, ստեղծել գործունէութեան լայն դաշտ Հայաստանի իւրաքանչիւր քաղաքացու համար:

Սիրելի′ հայրենակիցներ,

2017 թւականին նոր զարկ ենք տւել մեր զինւած ուժերն ամրապնդելու գործին: Իրականացուող փոփոխութիւնների արդիւնքում զաւակին բանակ ուղարկող ծնողները պէտք է վստահ լինեն, որ նա ծառայում է գերազանց կազմակերպւածութիւն եւ բացառիկ կարգուկանոն ունեցող զինւած ուժերում:

Մեր զինւորականներին եկէք մաղթենք բարի ծառայութիւն: Եկէք նրանց երախտագիտութիւն յայտնենք մեր անդորրը պաշտպանելու համար:

Եւս մէկ տարի է գումարւում Հայաստանի հազարամեակների անցեալին եւ մեր երիտասարդ անկախ պետականութեան պատմութեանը: Թող 2018 թւականին շարունակի ամրապնդւել Հայաստան-Արցախ-Սփիւռք եռամիասնութիւնը, անառիկ լինեն մեր սահմանները եւ հիւրընկալ` մեր օջախները:

Եկէք միասին բաժակ բարձրացնենք եւ խաղաղութիւն մաղթենք մեր Հայաստան աշխարհին, ջերմութիւն եւ ամրութիւն հաղորդենք մեր ընտանիքներին: Եւ միշտ յիշենք, որ մեր պետութեան հիմքը ընտանիքն է: Թող միշտ սիրոյ, երջանկութեան, հոգատարութեան եւ փոխըմբռնման մթնոլորտ տիրի մեզնից իւրաքանչիւրի տանը:

Շնորհաւո′ր Ամանոր եւ Սուրբ Ծնունդ»: