Աղբիւր՝ www.mindiaspora.am

Դեկտեմբերի 11-ին ՀՀ սփիւռքի նախարար Հրանոյշ Յակոբեանն ընդունեց Թեհրանի քաղաքապետարանի մշակոյթի եւ արուեստի կազմակերպութեան տնօրէն դոկտոր Մահմուդ Սալահիի ղեկավարած պատուիրակութեանը, որի կազմում էին Հայաստանում Իրանի Իսլամական Հանրապետութեան արտակարգ եւ լիազօր դեսպան Սեյեդ Քազեմ Սաջադին,  դեսպանատան քաղաքական, տնտեսական,  մշակութային կապերի պատասխանատուներ:

Ողջունելով հիւրերին` սփիւռքի նախարարը կարեւորեց Իրանի անուրանալի ներդրումը տարածաշրջանում խաղաղութիւն պահպանելու գործում, բարձր գնահատեց հայ–իրանական բարեկամութիւնը, որը դարերի պատմութիւն ունի: Նախարարը մասնաւորապէս նշեց. «Շնորհակալ ենք, որ իրանական կառավարութիւնը ստեղծում է բոլոր հնարաւորութիւնները, որ հայերը ոչ միայն ապրեն ու զարգանան, այլեւ ակտիւ մասնակցութիւն ունենան երկրի քաղաքական, տնտեսական, հասարակական ու մշակութային կեանքին»:

Դոկտոր Մահմուդ Սալահին շնորհակալութիւն յայտնեց ջերմ ընդունելութեան, արդիւնաւէտ երկխօսութեան համար:

Անդրադարձ կատարուեց Հայաստանում զբօսաշրջութեան զարգացման հեռանկարներին, ներդրումների խրախուսման, տնտեսական, մշակութային կապերի ընդլայնման հնարաւորութիւններին: Քննարկուեցին համագործակցութեանը վերաբերող հեռանկարային հարցեր: