Աղբիւր՝ www.yerkir.am

Նախագահ Սերժ Սարգսեանն ընդունել է Հայաստանում Իրանի Իսլամական Հանրապետութեան արտակարգ եւ լիազօր դեսպան Մոհամմադ Ռէիսին՝ դիւանագիտական առաքելութեան աւարտի կապակցութեամբ:

Նախագահը շնորհակալութիւն է յայտնել դեսպանին՝ պաշտօնավարման անցած երեք տարիներին հայ-իրանական յարաբերութիւնների զարգացման ու ամրապնդման գործում ներդրած ջանքերի համար եւ մաղթել յաջողութիւններ յետագայ գործունէութեան մէջ:

Սերժ Սարգսեանն ընդգծել է, որ Իրանի հետ յարաբերութիւնները Հայաստանի համար կենսական նշանակութիւն ունեն եւ պայմանաւորուած են ինչպէս պատմամշակութային ընդհանրութիւններով, այնպէս էլ փոխադարձ տնտեսական շահերով, աշխարհաքաղաքական դիրքի առանձնայատկութիւններով, տարածաշրջանային մի շարք խնդիրների նկատմամբ ընդհանուր մօտեցումներով:

ՀՀ Նախագահը եւ ԻԻՀ դեսպանը երկուստէք կարեւորել ու արժեւորել են Հայաստանի եւ Իրանի միջեւ ձեւաւորուած հարուստ օրակարգի շրջանակներում շարունակաբար խորացող եւ ամենատարբեր ոլորտներ ներառող համագործակցութիւնը՝ միաժամանակ ընդգծելով բարձր մակարդակի յաճախակի փոխայցելութիւնների եւ պարբերական խորհրդակցութիւնների անցկացման անհրաժեշտութիւնը:

Դեսպան Մոհամմադ Ռէիսին շնորհակալութիւն է յայտնել դիւանագիտական առաքելութեան իրականացման ամբողջ ընթացքում Հայաստանում իրեն ցուցաբերած աջակցութեան եւ համագործակցութեան պատրաստակամութեան համար՝ ընդգծելով, որ որտեղ էլ յետագայում շարունակի դիւանագիտական աշխատանքը, որքան հնարաւոր է օգտակար կը լինի բարեկամ Հայաստանին եւ հայ ժողովրդին, որի նկատմամբ յատուկ ջերմ վերաբերմունք ունի: