Աղբիւր՝ www.armenianchurch.org
Օգոստոսի 5-ին Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսը նամակ է հղել Կովկասի մահմեդականների վարչութեան նախագահ, Ադրբեջանի հոգեւոր առաջնորդ Շէյխ-ուլ-Իսլամ Ալլահշուքիւր Փաշա Զադեհին` կոչ անելով ջանքեր գործադրել, որպէսզի երկրի իշխանութիւնների կողմից չվտանգւի Ղարաբաղեան հակամարտութեան խաղաղ կարգաւորման գործընթացը:
Ամենայն Հայոց Հայրապետի նամակում մասնաւորապէս ասւում է. «Սահմանամերձ բնակավայրերի անդադար գնդակոծութիւնը ադրբեջանական կողմից, դիւերսիոն գործողութիւնները, հրադադարի ռեժիմի խախտման տեւական փորձերը լուրջ վտանգ են ներկայացնում մեր տարածաշրջանի փխրուն, բայց թանկ ձեռքբերւած խաղաղութեան համար:
Մենք խորապէս անհանգստացած ենք լարւած իրավիճակով, որի հետեւանքով զոհւում են զինւորներ, խաթարւում է սահմանամերձ բնակչութեան խաղաղ կեանքը: Աստւածատուր մարդկային կեանքը սուրբ է, իսկ դրա իրաւունքը` սրբազան, եւ ոտնձգութիւնները մարդկային կեանքի հանդէպ անթոյլատրելի են:
Սադրանքները եւ մարտական գործողութիւնները չեն կարող այլընտրանք լինել ղարաբաղեան հակամարտութեան կարգաւորմանը խաղաղ, բանակցային ճանապարհով` համապատասխան միջազգային նորմերին: Հաւատարիմ մնալով Մոսկւայի եւ Համայն Ռուսիոյ Պատրիարք Կիրիլ Ա-ի միջնորդութեամբ անցկացւող տարածաշրջանի հոգեւոր առաջնորդների եռակողմ հանդիպումների խաղաղարար ոգուն` մենք դիմում ենք ձեզ` որպէս Ադրբեջանի հոգեւոր առաջնորդի, ջանքեր գործադրելու, որպէսզի ձեր երկրի իշխանութիւնները, պահելով աւելի վաղ ձեռք բերւած պայմանաւորւածութիւնները, պահպանեն հրադադարի ռեժիմը եւ իրենց գործունէութեամբ չխափանեն ղարաբաղեան հիմնախնդրի խաղաղ կարգաւորման գործընթացը, խաղաղութիւնն ու կայունութիւնը տարածաշրջանում»: