Երկուշաբթի, 20 յունիսի 2022 թւականին, ներկայութեամբ թեմիս Առաջնորդ գերշ. Տէր Սիփան Ս. Եպս. Քէչէճեանի, Թեմական խորհրդի ատենապետ Վրէժ Տէր Մարտիրոսեանի, Պատգ. ժողովի Ա. ատենադպիր Արմինէ Սիմոնեանի, Կրօնական խորհրդի փոխ-ատենապետ Տէր Մեսրոպ աւ. քհնյ. Գալստանեանի, Հայ Դատի յանձնախմբի ներկայացուցիչ Արբի Բաբայեանի, եւ սոյն մարմինների այլ անդամների եւ Ն. Ջ. Փերիոյ Կրթասիրաց եւ Հայ Ուսում. Չհարմահալ միութիւնների վարչութիւնների տեղի ունեցաւ միութիւններին յատկացւած նոր կենտրոնատեղիի բացման հանդիսութիւնը:

Հանդիսութիւնը բացւեց Տէրունական աղօթքով, որից յետոյ Հայ Ուսում. Չհարմահալ միութեան նախագահ Վրթանէս Մկրտչեանը, զոյգ միութիւնների անունից, բարի գալուստ մաղթեց հիւրերին եւ շնորհակալութիւն յայտնեց հրաւէրին ընդառաջելու համար, նաեւ երախտագիտութեան խօսք ուղղեց Պատգ. ժողովի դիւանի եւ Թեմական խորհրդի նախկին եւ գործող կազմերին՝ թեմապատկան այդ շէնքը, որպէս կենտրոնատեղի իրենց տրամադրելու համար:

Այնուհետեւ Սրբազան Հայրը Ն. Ջ. Փերիոյ Կրթ. եւ Հայ Ուսում. Չհարմահալ միութիւնների նախագահներ՝ Զարենուշ Աղուրեանի եւ Վրթանէս Մկրտչեանի հետ միասին հատեց մուտքի ժապաւէնը` յայտարարելով կենտրոնատեղիի պաշտօնական բացումը:

Թեմակալ Առաջնորդ Տէր Սիփան Ս. Եպս. Քէչէճեանը շնորհաւորանքի եւ բարեմաղթանքի իր արտայայտութիւններում նշեց. «Ն. Ջ. Փերիոյ Կրթ. եւ Հայ Ուսում. Չհարմահալ միութիւնները սկսում են նոր կեանք՝ նոր կենտրոնատեղիով, նոր հնարաւորութիւններով եւ նոր ծրագրերով: Դիւրին է ծրագիր մշակելն ու գործադրելը, սակայն դժւար է նոր անդամներ ընդունելը: Իմ բարեմաղթանքն է, որ զոյգ միութիւնների շարքերը համալրւեն նոր ու երիտասարդ անդամներով եւ նոր ծրագրերի մեկնարկը բերի աշխատանքային նորանոր յաջողութիւններ»: Սրբազան Հայրը շնորհակալութեան եւ երախտիքի խօսք ուղղեց Պատգ. ժողովի եւ գործադիր մարմինների անցեալի եւ ներկայ կազմերին՝ միութիւններին հովանաւորելու համար:

Հանդիսութեան շարունակութեան մէջ, հիւրերը շրջայց կատարեցին կենտրոնատեղիում եւ ծանօթացան տարբեր բաժինների հետ, այնուհետեւ մտերմիկ մթնոլորտում շարունակւեց ծրագիրը, որի ընթացքում ներկաների կողմից հնչեցին շնորհաւորանքներ ու բարեմաղթանքներ:

Հայ Ուսում. Չհարմահալ միութեան վաստակաշատ անդամ Թաթուլ Օհանեանը, իր ուրախութիւնը յայտնելով այս միջոցառմանը ներկայ լինելու համար, յոյս յայտնեց, որ երկու միութիւնները՝ հաւատարիմ իրենց կոչմանը, որեւէ ջանք չեն խնայել տարածելու հայկական մշակոյթը, նամանաւանդ Փերիոյ եւ Չհարմահալ գիւղերի հայկական աւանդական սովորութիւններն ու ծէսերը: Նա նշելով, որ ամբողջ Սփիւռքում  չկայ 450 տարի վաղեմութիւն ունեցող հայկական գիւղ, ցանկացաւ արժեւորել եւ պահպանել բոլոր աւանդոյթները եւ վերականգնել ու փոխանցել յետագայ սերունդներին:

Թեմական խորհրդի ատենապետ Վրէժ Տէր Մարտիրոսեանը եւս իր հերթին, Թեմական խորհրդի եւ իր անունից շնորհաւորանքի խօսքեր փոխանցեց երկու միութիւններին եւ նրանց մաղթեց համագործակցութիւն եւ յաջող գործունէութիւն՝ իրենց աշխատանքներում:

Հանդիսութեան ընթացքին խօսք առաւ նաեւ Փերիոյ Կրթ. միութեան Շահինշահրի մասնաճիւղի անդամ Ջանի Թահմազեանը: Նա երկրորդելով անցեալի աւանդոյթները նոր սերնդին փոխանցելու կարեւորութիւնը, շեշտեց այդ գործի համար համապատասխան ծրագիր մշակելու անհրաժեշտութիւնը եւ յոյս յայտնեց, որ ազգային մարմինները միութիւններին հովանաւորելու են այս գործում, նաեւ սատարելու են Շահինշահրի մասնաճիւղի աշխատանքների վերսկսմանը:

Արտայայտւեցին նաեւ Տէր Մեսրոպ աւ. քհնյ. Գալստանեանը եւ Տէր Վարդան Աղաբաբայեանը, որոնք եւս ընդգծեցին աւանդոյթներն ու յատկապէս միմեանց նկատմամբ յարգանքի անհրաժեշտութիւնը:

Հայ Դատի յանձնախմբի ներկայացուցիչ Արբի Բաբայեանը եւս նշելով, որ ցանկացած պահի, երբ զոյգ միութիւնների օգնութեան անհրաժեշտութիւնն է զգացւել, նրանք եղել են յանձնախմբի կողքին, նշեց, որ իրենք եւս ինչպէս անցեալում, այսուհետեւ եւս զօրավիգ են լինելու նրանց եւ համագործակցելու են միմեանց հետ:

Հանդիսութեան ընթացքում հնչեցին երգեր եւ ասմունքներ:

Թղթակից (Նոր Ջուղա)