Սպահան նահանգի նահատակների եւ անձնուրացների հարցերով հիմնարկի պատւէրով եւ թեմիս Թեմական խորհրդի համագործակցութեամբ նկարահանւած «Նահատակ» վաւերագրական ֆիլմի առաջին ցուցադրումը տեղի ունեցաւ չորեքշաբթի՝ 2022 թւականի յունիսի 15-ին, նոյն հիմնարկի ամֆիթատրոնում:

Ֆիլմի ցուցադրմանը ներկայ էին թեմակալ Առաջնորդ գերշ. Տէր Սիփան Ս. Եպս. Քէչէճեանը, Թեմական խորհրդի ատենապետ Վրէժ Տէր Մարտիրոսեանը, Կրօնական խորհրդի անդամ Սաքօ Տէր Յովհաննիսեանը, Տէր Մեսրոպ աւ. քհնյ. Գալստանեանը եւ Տէր Սահակ քհնյ. Մինասեանը, միութիւնների ու դպրոցների ներկայացուցիչները:

Սրբազան Հօրը եւ նրան ընկերակցող պատւիրակութեանը դիմաւորեցին հիմնարկի գլխաւոր տնօրէն Մասուդ Ահմադի Նիան եւ գեղարւեստական ղեկավար Սէյէդ Մոռթեզա Հոսէյնին:

Հայերէն լեզւով այս ֆիլմը ներկայացնում է Իրան-Իրաք պարտադրեալ պատերազմի Սպահանի հայ նահատակների կեանքն ու հերոսութիւնը:

Ֆիլմի դիտումից յետոյ, գերշ. Տէր Սիփան Ս. Եպս. Քէչէճեանը շնորհակալութիւն յայտնեց նահանգի նահատակների եւ անձնուրացների հարցերով հիմնարկին՝ այս գեղեցիկ մտայղացման համար: «Այս մեզ տարաւ հեռու անցեալ՝ մինչեւ պատերազմի օրերը՝ 1980-ականները, անդրադարձաւ Իրանի պաշտպանութեան գործում հայ նահատակների անձնազոհութեանն եւ նահատակութեանը, որոնք մեզ են պատգամում` սէր, հաւատարմութիւն եւ կապւածութիւն ծննդավայր հայրենիքին ու հողին», յաւելեց նա:

Ֆիլմի ռեժիսորն է Սայիդ Աֆսառին: Ֆիլմում նկարահանւել են՝ թեմիս Առաջնորդ գերշ. Տէր Սիփան Ս. Եպս. Քէչէճեանը, Տէր Սահակ քհնյ. Մինասեանը, Ալբերտ սարկաւագ Ղազարեանը, Ս. Ամենափրկիչ Վանքի «Տաթեւ» երգչախմբի անդամները, նահատակ Հրաչ Յակոբեանի քոյր՝ Ասանէթ Յակոբեանը եւ նահատակ Ռայմոնդ Խաթուն Նեժադի եղբայր՝ Ռազմիկ Խաթուն Նեժադը:

Ֆիլմի ստեղծման գործում իրենց համագործակցութիւնն են ցուցաբերել համայնքիս անդամներ՝ Կարին Տէր Մարտիրոսեանը, Դրօ Տէր Մարտիրոսեանը, Արթին Քեշիշեանը, Արբի Բաբումեանը եւ Հայկ Խոսրովեանը:

Ֆիլմի ցուցադրման աւարտին, Սպահան նահանգի նահատակների եւ անձնուրացների հարցերով հիմնարկի կողմից, ձեռամբ Սրբազան Հօր եւ հիմնարկի տնօրէնների երախտագիտութեան եւ գնահատանքի գիր շնորհւեց ֆիլմի ստեղծագործական խմբին:

Հանրային կապ

Սպահանի հայոց թեմի Ազգային առաջնորդարանի