Չորեքշաբթի՝ յունիսի 1-ին, Սպահանի Քաղաքապետարանի Մաշկութային բաժնի հրաւէրով, Թեմիս Առաջնորդ Գերշ. Տէր. Սիփան Ս. Եպս. Քէչէճեանն այցելեց Սպահանի «Խաջու» կամրջի ժամանակաւոր վերաբացւած «Բիգլարբէյգի» կամ «Շահնեշին» կոչւող բաժինը:

Սրբազան Հօրը դիմաւորեցին Քաղաքապետարանի եւ Զբօսաշրջութեան հիմնարկի պատասխանատուները եւ համապարփակ բացատրութիւններ ներկայացրին վերաբացւած բաժնի ուղղութեամբ:

Թեմակալ Առաջնորդն այս այցելութեան առթիւ իր պատգամում այսպէս արտայայտւեց. «Այսօր իմ կեանքի ամենաբացառիկ եւ ամենայիշարժան օրերից մէկն է, որովհետեւ այցելել եմ «Խաջու» կամուրջը եւ վայելում եմ բնութեան ամենագեղեցիկ տեսարաններից մէկը: Ուրախ եմ ու հպարտ, առաջին հերթին այն պատճառով, որ կանգնել եմ մի պատմական կամուրջի վրայ, որի տակով հոսում է «Զայանդէռուդ»-ը, որը նշանակում է կեանք տւող, կեանք պարգեւող, իսկ երկրորդ հերթին՝ քանի որ ինձ առիթ է ընձեռւել մուտք գործել այնպիսի վայր, որն իրականութեան մէջ քչերին է բաժին հասնելու»:

«Երբ կանգնում ես կամրջի այս հատւածում, մի կողմից վայելում ես ջրի աղմուկը՝ դիտելով հորդառատ գետը, միւս կողմից՝ հանգիստն ու լռութիւնը՝ տեսնելով հանդարտ հոսող գետը, որն այս կամրջի կառուցման գլուխգործոցներից է», հիացմունքով աւելացրեց նա:

Սրբազան Հայրն իր արտայայտութիւնների աւարտին շնորհակալութիւն յայտնեց Սպահանի նահանգապետարանին, քաղաքապետարանին եւ բոլոր պատասխանատուներին այս հրաւէրի համար, բոլորին ցանկանալուվ առողջութիւն եւ արեւշատութիւն:

Հանրային կապ

Սպահանի հայոց թեմի Ազգ. Առաջնորդարանի