Նախաձեռնութեամբ Ն. Ջ. Հայ Մ. Մ. «Արարատ» միութեան Կենտ. վարչութեան, ուրբաթ՝ փետրւարի 25-ի երեկոյեան, տեղի ունեցաւ վարչական նախկին եւ այլ միաւորների վարչութեան անդամ ընտրւած միութենականների գնահատանքի երեկոյ:

Ծրագրին ներկայ էին միութեան արտօնատէր՝ Թաթուլ Օհանեանը, Կենտրոնական վարչութեան անդամներն ու հրաւիրեալները:

Բացման խօսքով հանդէս եկաւ Կենտ. վարչութեան քարտուղարուհի՝ Միգանուշ Տէր Մարտիրոսեանը:

Նա իր խօսքում ասաց. «Ն. Ջ. Հայ Մ. Մ. «Արարատ» միութիւնկը կառչած իր կանոնագրութեանը, իրագործում է նախատեսւած նպատակները: Դրանից ելնելով, իւրաքանչիւր միութենական ընկերոջ ներդրած եռանդը միութենական կեանքով արժէքաւոր է: Ուստի Միութեան 23-րդ Պատգ. ժողովից ընտրւած Կենտ. վարչութիւնը որոշեց գնահատել նախորդ երկու տարիների ընթացքում միութեան Կենտրոնական, մասնաճիւղի եւ միաւորների վարչական ընկերներին, որոնք այժմ նոյն վարչութեան անդամները չեն»:

Այնուհետեւ հրաւիրեց միութեան արտօնատէր՝ Թաթուլ Օհանեանին, իր խօսքը փոխանցելու ներկաներին:

Նա գնահատելով Կենտ. վարչութեանը՝ իր այս գեղեցիկ մտայղացման համար, ասաց. «Գնահատանք է տրւում անձին, ոչ թէ որպէս անձի պաշտամունք, այլ հանարային կեանքում նրա ներդրած ջանասիրութեան ու աշխատանքի համար, այն նաեւ խրախուսանքի միջոց է շրջապատի համար, փաստելու, որ լաւ գործը աննկատ չի մնում»:

«Միութենական աշխատանքը մարդու մէջ զարգացնում է հաւաքական եւ մէկ նպատակի շուրջ աշխատելու գաղափարը, ինչպէս նաեւ եսամոլութիւնը յաղթահարելու կամքը: Այն յատկապէս միջոց է ծառայելու հայ ժողովրդի մշակոյթին եւ հայապահպանմանն ուղղւած աշխատանքներին, որին լծւած են նաեւ Ն. Ջ. Հայ Մ. Մ. «Արարատ» միութեան բոլոր անդամները», աւելացներց նա:

Միութեան արտօնատէր՝ Թաթուլ Օհանեանը, շնորհաւորելով գնահատանքի արժանացած միութենականներին, յոյս յայտնեց, որ յետագայում եւս վայելելու են նրանց մասնակցութիւնը միութենական աշխատանքներին:

Յաջորդիւ արտայայտւեց միութեան Կենտ. վարչութեան նախագահ ժորժ Ղազարեանը:

Ժորժ Ղազարեանը եւս իր հերթին շնորհակալութիւն յայտնեց ներկաներին՝ հրաւէրին ընդառաջելու եւ միջոցառմանը մասնակցելու համար: Ապա անդրադառնալով համաճարակի հետեւանքով անցնող երկու տարիների ընթացքում ստեղծւած դժւարութիւններին, յոյս յայտնեց, որ շուտով յաղթահարւելու է այս ճգնաժամը եւ միութեան աշխատանքներն եւս ընթանալու են բնականոն հունով:

Նա իր արտայայտութիւններն եզրափակեց շնորհաւորանքի խօսք ուղղելով վարչական նախկին եւ այլ միաւորների վարչութեան անդամ ընտրւած միութենականներին, ցանկանալով, որ առաջիկայ երկու տարիների ընթացքում եւս նրանք աջակցելու են միութեան աշխատանքների իրականացմանը:

Հանդիսութիւնն աւարտւեց գնահատագրերի բաշխմամբ եւ հիւրասիրութեամբ:

Թղթակից (Նոր Ջուղա)