Նոր Ջուղայի Հայ Մարզա-Մշակութային «Արարատ» միութեան 23-րդ Պատգամաւորական ժողովն սկիզբ առաւ հինգշաբթի՝ յունւարի 13-ի երեկոյեան: Ժողովին ներկայ էին ՍՀԹ Թեմական խորհրդի եւ Հաշւեքննիչ մարմնի ներկայացուցիչները, Կենտրոնական վարչութեան անդամներն ու նոյն վարչութեան կողմից հրաւիրեալները, միութեան միաւորների վարչութիւնների, ինչպէս նաեւ Շահինշահրի մասնաճիւղի ներկայացուցիչները եւ պատկան ներկայացուցչական կամ ընդհանուր ժողովներից ընտրւած պատգամաւորները, Ֆուտբոլի յանձնախմբի եւ Կարգապահական կազմի ներկայացուցիչները, ներքին վարիչը եւ խորհրդակցական հրաւիրեալները՝ 28 վճռական եւ 11 խորհրդակցական ընդհանուր պատկերով:

Սկզբում ներկաները մէկ րոպէ յոտնկայս լռութեամբ յարգեցին Արցախի 44-օրեայ պատերազմի նահատակների յիշատակը, որից յետոյ յանուն միութեան Կենտրոնական վարչութեան արտայայտւեց նախագահ Ժորժ Ղազարեանը, ով ակնարկելով համավարակային իրավիճակում ստեղծւած դժւարութիւններին, նշեց թէ միութեան Կենտրոնական վարչութիւնը ջանք չի խնայել լաւագոյնս իրականացնելու՝ յանուն միութեան վերելքի եւ յոյս յայտնեց, որ առաջիկայ գործունէութեան ընթացքը լինելու է աւելի դիւրին պայմաններում: Յաջորդիւ միութեան արտօնատէր՝ Թաթուլ Օհանեանի ժողովին ուղղւած ուղերձն ընթերցւեց միութեան Կենտ. վարչութեան քարտուղար Միգանուշ Տէր-Մարտիրոսեանի միջոցով: Ուղերձից մի հատւածի մէջբերում. «Ի խորոց սրտի ցաւում եմ, որ ինձանից անկախ պատճառների բերումով չկարողացայ ժամանակին հայրենիքից վերադառնալ եւ ներկայ լինել Ժողովիդ, բայց վստահեցնում եմ ձեզ, հակառակ իմ ֆիզիքական բացակայութեան, ես մտքով ու հոգով ձեզ հետ եմ եւ ինչպէս անցնող 70 տարիներում՝ որպէս կրտսեր եւ միջին տարիքի անդամ եղել եմ Արարատի ու ժամանակի անդամների կողքին, այսօր էլ՝ որպէս ամենաերէց անդամ եւ արտօնատէր կանգնած եմ ձեր կողքին, ի խնդիր մեր սիրելի Արարատի առաւել զարգացման եւ յառաջադիմութեան»:

Այնուհետեւ ժողովն ընթացաւ օրակարգի համաձայն. ընտրւեցին մնայուն դիւանն ու յանձնախմբերը եւ ընթերցւեց Կենտ. վարչութեան երկամեայ գործունէութեան նիւթա-բարոյական զեկոյցը, որից յետոյ ժողովականները շրջանաւարտ Կենտ. վարչութեանն ուղղեցին իրենց հարցումները եւ արտայայտւեցին ըստ էութեան:

Ժողովը շարունակւեց նաեւ ուրբաթ՝ յունւարի 14-ի առաւօտեան, ուր մասնակիցները գնահատելով միութեան կացութիւնը՝ ներկայացրին առաջիկայ երկու տարիների գործունէութեան շուրջ իրենց տեսակէտներն ու կառուցողական առաջարկները:

23-րդ Պատգամաւորական ժողովը շարունակւելու է երկուշաբթի՝ յունւարի 17-ի երեկոյեան:

Հարկ է նշել, որ առաջին նիստին ներկայ գտնւեց նաեւ Իսլ. խորհրդարանում Սպահանի եւ հարաւային իրանահայութեան պատգամաւոր Ռոբերտ Բեգլարեանը, ով աշխատանքային այցով գտնւում էր Նոր Ջուղայում: Պատգամաւորը յաջողութիւն մաղթելով ժողովին՝ պատասխանեց իր գործունէութեան շրջագծում մի շարք հարցումների:

Թղթակից (Նոր Ջուղա)