Շաբաթ՝ 2014 թւականի յունիսի 21-ին, Ս. Գրիգոր Լուսաւորիչ բազմաչարչար Հայրապետի վիրապից դուրս բերւելու տօնին, Սպահանի հայոց թեմի թեմակալ առաջնորդ՝ գերշ. Տ. Բաբգէն եպս. Չարեանի եւ Կրօնական խորհրդի յատուկ կարգադրութեամբ, երեկոյեան ժամը 6:00-ին, նախագահութեամբ առաջնորդ Սրբազան Հօր, սուրբ եւ անմահ Պատարագ մատուցւեց Նոր Ջուղայի Ս. Գրիգոր Լուսաւորիչ եկեղեցում, որի անւանակոչութեան տօնն էր միաժամանակ: Արարողութեանը ներկայ էին հոգեւորականաց ու դպրաց դասերը եւ համայնքի հաւատաւոր ժողովուրդը. ոչ միայն եկեղեցու սրահն էր մարդաշատ եւ լեցուն, այլ նաեւ եկեղեցու բակում բազմութիւն էր հաւաքւել: Պատարագիչն էր արժն. Տ. Խաչատուր քհնյ. Զարգարեանը, իսկ երգեցողութիւնը կատարեց Ս.Ա. վանքի «Կոմիտաս» երգչախումբը:
Յընթացս սուրբ Պատարագի, յաւուր պատշաճի քարոզեց առաջնորդ Սրբազան Հայրը՝ ներկայացնելով օրւայ խորհուրդը, շեշտելով լուսաւորչեան հաւատի առանձնայատկութիւններն ու զօրութիւնը, որը բացառիկ օրինակ պէտք է հանդիսանայ իւրաքանչիւր հայորդու, ինչը առաւել քան 1700 տարի ապահովել է հայ ժողովրդի գոյատեւումն ու երթը: Գերշ. Սրբազան Հայրն անդրադառնալով քրիստոնէութեան սուրբերի կրած նեղութիւններին, հալածանքներին, նախատինքին ու ատելութեանը, շեշտեց, որ դրանք ոչ միայն հաւատի տկարութեան պատճառ են դարձել, այլ ընդհակառակը՝ աշխարհով մէկ մեր Տիրոջ եւ Փրկչի՝ Յիսուս Քրիստոսի սուրբ Աւետարանը տարածւելու եւ քարոզւելու գրաւականն են հանդիսացել: Թեմակալ առաջնորդը յորդորելով հաւատացեալ ժողովրդին՝ իրենց հաւատի մէջ ամուր եւ անվախ մնալու համար, կոչ ուղղեց բոլորին, որպէսզի այսուհետեւ Ս. Գրիգոր Լուսաւորչի վիրապից դուրս բերւելու տօնն առաւել մեծ շուքով եւ հանդիսութեամբ տօնեն՝ Ս. Գէորգ եւ Ս. Սարգիս զօրավարների տօների օրինակով, քանի որ այն համարւում է Հայոց աշխարհի պետականօրէն քրիստոնէացման եւ Հայոց եկեղեցու հաստատման եւ հիմնադրութեան պատճառը, իսկ սուրբ Գրիգոր Լուսաւորիչն՝ ինքը հանդիսանում է հայոց հաւատի հայրն ու Հայաստան աշխարհի երկրորդ լուսաւորիչը՝ Ս. Թադէոս եւ Ս. Բարդուղիմէոս առաքեալներից յետոյ:
Ս. Պատարագի աւարտին, Առաջնորդ Սրբազան Հայրը, քահանայից եւ դպրաց դասերի եւ ներկայ ժողովրդի ուղեկցութեամբ, հայոց առաջին հայրապետ Ս. Գրիգոր Լուսաւորչի աջ-մասունքը վեր բարձրացրած թափօր դարձաւ եկեղեցու բակում եւ սրահում, այն մատուցելով հաւատաւոր ժողովրդին՝ համբուրելու եւ երկիւղածութեամբ յարգանքի տուրք մատուցելու բազմաչարչար հայրապետի սուրբ աճիւններին, ապա աջի օրհնութեամբ կատարւեց Ջրօրհնէքի արարողութիւն եւ ջուրը բաժանւեց ներկաներին, որպէսզի այն, ինչպէս գերշ. Սրբազան Հայրն իր քարոզի մէջ անդրադարձաւ, լինի հիւանդութիւնների բժշկութիւն, ցաւերի փարատում եւ դժւարութիւնների վերացում:
Եկեղեցական արարողութիւնից յետոյ, եկեղեցու բակում, Եկեղեցեաց Վարչութեան կարգադրութեամբ եւ երէցփոխի ու Տիկնաց յանձնախմբի ջանքերով կազմակերպւել էր հիւրասիրութիւն, որի ընթացքում ներկայացւեց գեղարւեստական կոկիկ մի յայտագիր՝ բաղկացած երգերից եւ ասմունքից: Սրտի խօսք ասաց արժն. Տ. Խաչատուր քհնյ. Զարգարեանը՝ գնահատելով տօնի առիթով աշխատած բոլոր անձանց, եւ ողջունեց հաւատացեալ ժողովրդի խուռներամ մասնակցութիւնը:
Վերջում գերշ. Տ. Բաբգէն եպս. Չարեանն իր հայրական խօսքը փոխանցեց ուխտաւոր ներկաներին՝ ազգային-եկեղեցական կեանքում բազմամարդ եւ միասնական ներկայութեան կարեւորութիւնը շեշտելով, եւ յոյս յայտնեց, որ յաջորդ տարիներում տօնը նշւելու է առաւել շուքով եւ հանդիսութեամբ:
