Կիրակի՝ 2020 թւականի դեկտեմբերի 27-ի առաւօտեան, Թեհրանից Սպահան ժամանած Բանակի գերագոյն գլխաւոր հրամանատարի պաշտպանական արդիւնաբերութեան գծով խորհրդատու գեներալ Հոսէյն Դեհղանը, Ամանորի եւ Ս. Ծննդեան տօնի առթիւ այցելեց Իրան-Իրաք պարտադրեալ պատերազմի նահատակ Վարդան Աբրահամեանի ծնողների բնակարն, ուր հանդիպեց նահատակի մօրը եւ միւս հարազատներին։
Սոյն այցին ներկայ էին նաեւ Սպահանի հայոց թեմի առաջնորդ գերշ. Տ. Սիփան եպս. Քէչէճեանն ու Թեմական խորհրդի ատենապետ Վարուժ Մինասեանը եւ խորհրդի անդամ Վահիկ Թորոսեանը։
Հանդիպման ընթացքում զրոյց ծաւալւեց հայ եւ պարսիկ ազգերի մօտ նահատակի կարեւոր նշանակութեան եւ արժէւորման մասին, ապա գեներալ Դեհղանը անդրադառնալով հայ ժողովրդի կարեւոր դերակատարութեանը` Իրանի պատմութեան եւ յատկապէս պարտադրեալ պատերազմի ընթացքում, բարձր գնահատեց իրանահայութեան զոհողութիւնները, յատկապէս յիշելով հայ նահատակներին, գերիներին եւ անձնուրացներին։
Սրբազան Հայրն իր խօսքում իր եւ թեմի ազգային իշխանութեան անունից շնորհակալութիւն յայտնելով գեներալին՝ Նահատակների հիմնարկի տնօրէն եղած ժամանակ իր կատարած գործունէութեան եւ ընդհանրապէս նահատակների ընտանիքներին կարեւորութիւն տալու եւ պարբերաբար նրանց այցելելու համար, աղօթեց առ Բարձրեալն Աստւած, որ Նոր տարին լինի լի խաղաղութեամբ, բարեկամութեամբ եւ առողջութեամբ։
Վերջում գեներալ Դեհղանին յուշանւէրներ յանձնեց նահատակի ծնողին։

Թղթակից (Նոր Ջուղա)