Ուրբաթ՝ մայիսի 30-ի երեկոյեան, Ն.Ջ. Հայ Մ.Մ. «Արարատ» միութեան շրջափակում մեծ հանդիսութեամբ նշւեց Հայաստանի Հանրապետութեան հիմնադրման 96-ամեակը, ներկայութեամբ Հայր Անանիա վրդ. Գուճանեանի, քահանայից դասի, Սպահանի հայոց թեմի ազգային մարմինների, շրջանի Հայ Դատի յանձնախմբի անդամների եւ հոծ թւով ժողովրդի:

Սկզբում հոգեւորականաց դասի միջոցով եւ Ս.Ա. Վանքի «Կոմիտաս» երգչախմբի երգեցողութեամբ տեղի ունեցաւ հանրապետական մաղթանք: Տօնակատարութեան պաշտօնական բացումն աւարտւեց դրօշակի արարողութեամբ, որտեղ Ն.Ջ. Հայ Մ.Մ. «Արարատ» միութեան Սկաուտական միաւորի դրօշակակիր խմբի միջոցով ծածանւեց Հայաստանի Հանրապետութեան եռագոյն դրօշը եւ ներկաների յոտնկայս ունկնդրութեամբ հնչեցին Իրանի Իսլամական ու Հայաստանի հանրապետութիւնների օրհներգերը:

Ծրագրի շարունակութեան մէջ Հ.Հ. հիմնադրման 96-ամեակի տօնակատարութեան յանձնախմբի խօսքն ընթերցեց Մադլէն Ղարիբեանը: Նա նշեց, որ 1918 թւականի Մայիս        28-ին ծնունդ առած Հայաստանի Հանրապետութիւնը հայ ժողովրդի դարաւոր պայքարի ամեմամեծ յաղթանակն էր, կերտւած կարմիր արիւնով, կապոյտ երկնքի տակ, նարինջագոյն ու բարեբեր հողի վրայ: Մայիսեան սխրագործ հերոսներին իրենց յարգանքի տուրքը մատուցեցին շքերթ-տողանցքին մասնակից թեմի ազգային մարմինները, շրջանի Հայ Դատի յանձնախումբը, հայոց ազգային դպրոցների անձնակազմն ու աշակերտութիւնը, միութիւնների եւ երգչախմբերի վարչութիւնները, «Ռուբէն» երիտասարդական եւ «Թ. Թադէոսեան» պատանեկան միութիւնների, ՀՀ 96-ամեակի տօնակատարութեան յանձնախմբի եւ Հայ Մ.Մ. «Արարատ» միութեան Սկաուտական միաւորի անդամները:

Ապա բեմ հրաւիրւեց օրւայ բանախօս՝ Վրէժ Շիրւանեանը, ով անդրադառնալով Սարդարապատի, Բաշ Ապարանի ու Ղարաքիլիսայի հերոսամարտերին եւ Հայաստանի Հանրապետութեան կազմաւորման ընթացքին, մատնանշեց առաջին հանրապետութեան թողած դրական ազդեցութեանը՝ այսօրւայ Հայաստանի եւ Արցախի հանրապետութիւնների գոյութեան վրայ: Այնուհետեւ ներկաներին իր պատգամը փոխանցեց Տ. Անանիա վրդ. Գուճանեանը, որտեղ յայտնեց. «Մայիս 28-ի պատգամը պէտք է միշտ հնչի մեր ժողովրդի կեանքում. պէտք է Արցախը աւելի զօրանայ, ՀՀ աւելի ամրապնդւի, որպէսզի կարողանանք վերանորոգ կամքով շարունակել մեր ազգային պայքարը ամբողջական Հայաստանի տեսլականով»:

Ծրագրի յաջորդ բաժնում ազգային-յեղափոխական երգերի ոգեշնչող կատարումներով ելոյթ ունեցաւ այս առիթով Հայաստանից հրաւիրւած երգիչ Ներսիկ Իսպիրեանը, իսկ միջոցառման աւարտին տեղի ունեցաւ հրավառութիւն:

Օրւայ հաղորդավարութեամբ հանդէս եկաւ Մանիա Ղուկասեանը:

     Լուսանկարիչ` Գեւիկ Խաչատրեան