Իսլամական մշակոյթի եւ առաջնորդութեան Սպահանի գերատեսչութեան նախաձեռնութեամբ, չորեքշաբթի՝ 5 փետրւար 2020 թւականի երեկոյեան ժամը 7:00-ին, Սպահանի «Ֆարշչեան» դահլիճում իրականացւեց Իրանի Իսլամական յեղափոխութեան 41-ամեակին նւիրւած միջոցառում, ուր հրաւիրւել եւ ներկայ էին քաղաքի կրօնական փոքրամասնութիւնների ներկայացուցիչները:
Սպահանի հայոց թեմի կողմից ծրագրին ներկայ էին՝ թեմակալ առաջնորդ գերշ. Տ. Սիփան եպս. Քէչէճեանը, ազգային մարմինների եւ ենթամարմինների ու միութիւնների ներկայացուցիչներ:
Երեկոն սկիզբ առաւ Իրանի Իսլամական Հանրապետութեան հիմնի յոտնկայս ունկնդրութեամբ:
Այնուհետեւ Սպահանի հայոց թեմի Առաջնորդարանի դիւանապետ Արիս Դաւթեանի միջոցով ընթերցւեց գերշ. Տ. Սիփան եպս. Քէչէճեանի պատգամը, ուր Սրբազան Հօր եւ Սպահանի հայոց թեմի ժողովականութեան ու ժողովրդի անունից շնորհաւորանքի խօսք էր ասւած Իսլամական յեղափոխութեան 41-ամեակի առթիւ եւ կարեւորութեամբ ընդգծւած էր. «Ժողովրդից ակունք առած Իրանի Իսլամական յեղափոխութիւնը իր հիմնադիր եւ ներկայ հոգեւոր առաջնորդների ու միւս պատասխանատուների իմաստուն մարտավարութեան շնորհիւ, իր 41-ամեայ երթի ընթացքում կարողացել է դիմակայել ներքին եւ արտաքին զանազան թշնամիների դիմաց. թշնամիներ, որոնք որեւէ ջանք չեն խնայել Իսլամական յեղափոխութիւնը կործանելու համար, մինչեւ այն աստիճան, որ բացայայտօրէն ահաբեկեցին շրջանում ահաբեկչութեան դէմ պայքարող իրական մարտիկներից՝ գեներալ Սուլէյմանիին»:
Սրբազան Հօր խօսքի մի այլ բաժնում ասւած էր, որ իրանահայ համայնքը ոչ միայն որպէս երկրում ապրող կրօնական փոքրամասնութիւն, այլեւ որպէս Իրանի ժողովրդի անբաժան մասնիկ, յեղափոխութեան նպատակների իրականացման գործում եղել է իր հայրենակիցների կողքին եւ իր լաւագոյնը չի խնայել երկրի հողային ամբողջականութեան պաշտպանման ու բարգավաճման ուղութեամբ:
Ծրագրում ելոյթ ունեցան նաեւ Իսլամական մշակոյթի եւ առաջնորդութեան Սպահանի գերատեսչութեան տնօրէն հոջաթ. Անսարին, Կրօնների համալսարանի տնօրէն հոջաթ. Նաւաբը եւ Սպահանի նահանգապետ պրն. Ռեզային:
Հոջաթ. Անսարին իր խօսքում ընդգծելով, որ Իսլամական յեղափոխութիւնը կրօնական հիմքերի վրայ է յաջողութեամբ պսակւել, շեշտեց, թէ Իրանի Իսլամական յեղափոխութեան հիմնադիր-առաջնորդ Էմամ Խոմէյնին ոչ որպէս ռազմավարութիւն, այլ որպէս Սուրբ գիրք Ղուրանից ստացած ուսուցում, միշտ յարգալից մօտեցում է ցուցաբերել միւս կրօնների նկատմամբ եւ կարեւորել է զանազան կրօններին դաւանող ժողովրդի հետ խաղաղ համակեցութեան անհրաժեշտութիւնը:
Հոջաթ. Նաւաբն իր բանախօսական ելոյթը հիմնականում ծաւալեց Իսլամի Սուրբ գրքում կրօնների միասնականութեան եւ փոխադարձ յարգանքի մասին տրւած ուսուցումներից մէջբերումներ անելով եւ մերօրեայ ժամանակներում որոշ պետութիւնների եւ խմբաւորումների կողմից մարդկութեան դէմ իրականացւող ոճրագործութիւններին անդրադառնալով, իսկ պրն. Ռեզային նշելով Իսլամի թելադրանքներից՝ միաստւածութեան կրօնների խաղաղ համակեցութիւնը, շեշտեց, որ Իսլամական յեղափոխութիւնը աստւածային, կրօնական եւ միաստւածութեան գաղափարներն աշխարհի տարբեր ժողովուրդներում կենդանացրել է եւ Իրանի սահմանադրութեան շնորհիւ այսօր երկրի միաստւածութեան կրօնների ժողովուրդը ապրում են համերաշխութեան եւ փոխադարձ յարգանքի լոյսի ներքոյ: Նահանգապետը անդրադառնալով նաեւ օրեր առաջ Մշակութային ժառանգութեան, ձեռարւեստի եւ զբօսաշրջութեան նախարար դոկտ. Մունեսանի հետ Ս. Ամենափրկիչ վանք կատարած իր այցելութեանը եւ ընդհանրապէս Սպահանի հայոց թեմի ու հոգեւոր առաջնորդի հետ ունեցած բարեկամական յարաբերութիւններին՝ իր ուրախութիւնը յայտնեց, որ Իրանում կրօնական փոքրամասնութիւնները դերակատարութիւն ունեն զանազան մակարդակներում ընդունւող որոշումների հարցում:
Ծրագրում տեղ էին գտել նաեւ գեղարւեստական կատարումներ, իսկ աւարտին գնահատւեցին Իրան-Իրաք պարտադրեալ պատերազմի ընթացքում նահատակւած թեմիս հայորդիների ընտանիքները:
Թղթակից (Նոր Ջուղա)
