Ծաղկազարդին յաջորդող եօթնօրեակը կոչւում է Աւագ շաբաթ, որի եկեղեցական արարողութիւններն սկիզբ են առնում Աւագ երեքշաբթի օրը:
Աւագ երեքշաբթի երեկոյեան Շահինշահրում տեղի ունեցաւ ժամերգութիւն, որի ընթացքում ընթերցւեցին Հին Կտակարանից հատւածներ՝ մարդու անկման կամ մեղքի, Ջրհեղեղի եւ Նոյեան տապանի միջոցով փրկւած արդարների մասին, ապա օրւայ աւետարանական հատւածը, որ ընթերցւեց Շահինշահրի հոգեւոր տեսուչ հոգշ. Տ. Անանիա վրդ. Գուճանեանի միջոցով՝ Երկնքի Արքայութեան մասին Յիսուսի պատմած Տասը կոյսերի առակի վերաբերեալ: Աւետարանի ընթերցման պահին եկեղեցական շապիկ հագած տասը աղջնակներ, ովքեր ներկայացնում էին առակի հինգ իմաստուն եւ հինգ յիմար կոյսերին, վառւած մոմերով կանգնեցին Ս. Խորանի առջեւ: Արարողութեան աւարտին Հայր Սուրբն իր քարոզի մէջ ակնարկելով օրւայ խորհրդի մասին, բացատրեց առակի իմաստը. նա շեշտելով բարեգործութեամբ ու առաքինի կեանք վարելու եւ յաւիտենական կեանքին արժանանալու համար «պաշար» հաւաքելու մասին, Աստծուց խնդրեց, որ յատկապէս արարողութեանը մասնակից դարձած բոլոր աղջնակներին իմաստութիւն պարգեւի եւ գնահատեց նրանց ներկայութիւնը եւ մասնակցութիւնը արարողութեանը:
Ապրիլի 17-ը՝ Աւագ հինգշաբթի օրը, Տէրունական ընթրիքի եւ Ս. Հաղորդութեան խորհրդի հաստատման տօնն էր: Առաւօտեան Ս. եւ անմահ Պատարագ մատուցւեց Շահինշահրի Հայոց եկեղեցում հոգշ. Հայր Սուրբի միջոցով, տեղի ունեցաւ հաւաքական խոստովանանք եւ ներկաներն ստացան Ս. Հաղորդութիւն: Նոյն օրւայ երեկոյեան յատուկ հանդիսաւորութեամբ կատարւեց Ոտնալւայի արարողութիւնը: Այս տարի «Տարեցների տարւայ» առթիւ, Ոտնալւայի արարողութեանը մասնակից դարձան համայնքի տարեց անդամները, նրանց յարգանք մատուցելու համար: Արարողութեան ընթացքում օրհնւած իւղը, որը պատրաստւել էր Շահինշահրի Հայ կանանց եկեղեցասիրաց միութեան անդամների միջոցով, բաժանւեց հաւատացեալ ժողովրդին:
Ոտնալւայի կարգից յետոյ, կատարւեց Խաւարման երկարաժամ կարգը, որի ընթացքում ընթերցւեցին աւետարանական եօթ ընթերցումները՝ Քրիստոսի մատնութեան, չարչարանքի եւ խաչելութեան վերաբերեալ, երգւեցին հիասքանչ եւ խորիմաստ բովանդակութեամբ շարականներ ու երգեր:
Արարողութեան ընթացքում, «Փառք ի բարձունս»-ից յետոյ, երբ եկեղեցու լոյսերը տակաւին մարած էին, յուզիչ ու հոգեզմայլ «Ո՞ւր ես, մայր իմ» երգից յետոյ, մթութեան մէջ հոգշ. Հայր Սուրբը օրւան պատշաճ իր խօսքը փոխանցեց ներկայ հաւատացեալներին:
Ապրիլի 19-ի երեկոյեան, Աւագ շաբաթ օրը, Ս. Զատկի Ճրագալոյցին, մատուցւեց Ս. Պատարագ՝ հոգշ. Տ. Անանիա վրդ. Գուճանեանի միջոցով: Ս. Պատարագի ընթացքում տեղի ունեցաւ հաւաքական խոստովանանք, որից յետոյ հաղորդւեցին ներկայ հաւատացեալները: Այսպիսով իր աւարտին հասաւ մեծ պահոց ժամանակաշրջանը եւ արարողութեան վերջաւորութեանը հնչած «Այսօր յարեաւ ի մեռելոց» շարականի բառերով Քրիստոսի Յարութեան աւետիսը փոխանցւեց բոլորին:
Կիրակի՝ ապրիլի 20-ին, մեր տիրոջ՝ Յիսուս Քրիստոսի հրաշափառ յարութեան տօնի՝ Ս. Զատկի առթիւ հանդիսաւոր Ս. եւ անմահ Պատարագ մատուցւեց Սպահանի հայոց թեմի թեմակալ առաջնորդ գերշ. Տ. Բաբգէն եպս. Չարեանի ձեռամբ, ում սպասարկում էին հոգշ. Տ. Անանիա վրդ. Գուճանեանը եւ բրշն. Ռազմիկ սրկ. Գալստանեանը: Հոգեպարար արարողութեան ընթացքում, քարոզի պահին, գերշ. Սրբազան Հայրը Ս. Զատկւայ տօնի առթիւ իր պատգամը փոխանցեց հաւատացեալ ներկաներին՝ բնաբան ունենալով Պօղոս առաքեալի Հռոմէացիներին գրած նամակից այն հատւածը, որտեղ գրւած է. «Մկրտութեամբ թաղւեցինք Նրա հետ միասին եւ հաղորդ եղանք մահւանը, որպէսզի ինչպէս որ Քրիստոսը մեռելներից յարութիւն առաւ Հօր փառքով, նոյնպէս եւ մենք ապրենք մի նոր կեանքով»: Գերշ. Սրբազան Հայրն իր քարոզի մէջ ասաց. «Պօղոս առաքեալը թելադրում է մեզ ապրել մի նոր կեանք: Այնպէս ինչպէս Քրիստոսը պէտք է մեռնէր՝ մեռելներից յարութիւն առնելու համար, մենք եւս պէտք է «մեռնենք»՝ թօթափելով հին մարդը՝ մեղանչական մարդը, որպէսզի յարութիւն առնենք Քրիստոսով՝ ապրելու համար մի նոր կեանք: Այնպէս ինչպէս Պօղոս առաքեալը եփեսացիներին գրած իր նամակում ասում է. «Եղէ՛ք նոր մարդ՝ ստեղծւած Աստծու պատկերի համաձայն, եւ ճշմարիտ կեանքն ապրեցէք արդարութեամբ ու սրբութեամբ»: Պատարագիչ Սրբազան Հայրն իր քարոզի վերջաւորութեանն ասաց. «Հայ ժողովուրդը առաջին ազգը հանդիսացաւ, որ հոգեւորապէս մկրտւեց, ընդունեց քրիստոնէութիւնը, դարձաւ ժառանգակիցը Քրիստոսի, ճանաչեց ու հաւատաց Նրան, մեռաւ Նրա համար, թօթափեց հին մարդը՝ մեղանչական մարդը իր վրայից, կրեց ամէն տեսակի տառապանք եւ նեղութիւն, ցեղասպանութեան ենթարկւեց ու նահատակւեց, քայլեց Գողգոթայի ճանապարհով, խաչ բարձրացաւ, թաղւեց Քրիստոսի հետ, բայց հաւատաց բացւող արշալոյսին, հրաշափառ յարութեանը եւ յարութեամբ տրւած նոր եւ առաւել կեանքին: Այսօր մենք ո՞ր ճանապարհից ենք քայլելու. հին մեղանչակա՞ն կեանքի, թէ յաւիտենական Արդարի՝ յարութեամբ նոր կեանք պարգեւող Նոր Ադամի՝ Քրիստոսի ճանապարհից յաւիտենական կեանքը եւ երջանկութիւնը ժառանգելու: Ազգովին վերանորոգենք մեր հաւատը, յարութեան շնչով քայլենք դէպի պայծառ ապագայ, եւ յարութեան փառքով դէպի լուսաւոր ճանապարհ»:
Ս. Պատարագի աւարտին գերշ. Սրբազան Հայրը հոգշ. Հայր Սուրբի, դպրաց դասի եւ Շահինշահրի «Նարեկ» երգչախմբի կազմած թափօրով դուրս եկաւ դպրոցի բակ եւ այնտեղ պատրաստւած զատկական տաղաւարի մօտ, շրջապատւած ժողովրդի բազմութեամբ, ընթերցեց Աւետարանը եւ «Այսօր յարեաւ» շարականի երգեցողութեամբ աւետելով Քրիստոսի յարութեան լուրը՝ բոլորին շնորհաւորեց Ս. Զատկւայ տօնի կապակցութեամբ:
Հայոց դպրոցի բակում յատկապէս մանուկ-պատանիներն զբաղւած էին աւանդական հաւկթախաղով:
Հարկ է նշել, որ Մեծ պահքի եւ Աւագ շաբաթւայ բոլոր եկեղեցական արարողութիւնների երգեցողութիւնները կատարւեցին Շահինշահրի «Նարեկ» երգչախմբի միջոցով:
