Թեհրանի Հայ մշակութային «Արարատ» կազմակերպութեան հիմնադրման 70-ամեակին նւիրւած Գարնանային 26-րդ խաղերի հանդիսաւոր բացումը, ներկայութեամբ Թեհրանի եւ Սպահանի պաշտօնական հրաւիրեալների, մարզական պատւիրակութիւնների, միութենականների եւ հոծ բազմութեան տեղի ունեցաւ հինգշաբթի` 2014 թւականի մարտի 20-ի երեկոյեան ժամը 7:00-ին, խաղերը կազմակերպող Նոր Ջուղայի հայ Մ.Մ. «Արարատ» միութեան մարզասրահում:
Խաղերի պաշտօնական բացման հանդիսութիւնը մեկնարկեց հանդիսավարուհու ողջոյնի եւ բացման խօսքերով, որից յետոյ միութեան Սկաուտական միաւորի Արի-արենուշական հատւածի եւ Երէց փաղանգի ներկայացուցիչների մասնակցութեամբ կատարւեց դրօշակի արարողութիւն եւ ներկաների յոտնկայս ունկնդրութեամբ հնչեց Իրանի իսլ. Հանրապետութեան օրհներգը, ապա տեղի ունեցաւ մարզական պատւիրակութիւնների տողանցքը մասնակցութեամբ՝ Թեհրանի Հայ մշակութային «Արարատ» կազմակերպութեան (Հ.Մ.Ա.Կ.), Հայ Մ.Մ. «Սիփան» միութեան, Հայ ուսումնասիրաց «Չհարմահալ» միութեան, Հայ Մ. «Րաֆֆի» համալիրի, Հ.Մ.Ա.Կ.-ի Թաւրիզի մասնաճիւղի, Նոր Ջուղայի Հայ Մ.Մ. «Արարատ» միութեան եւ Շահինշահրի մասնաճիւղի մարզական պատւիրակութիւնների: Մարզական փառատօնի առթիւ ողջոյնի խօսքով հանդէս եկաւ Սպահանի հայոց թեմի առաջնորդ՝ գերշ. Տ. Բաբգէն եպս. Չարեանը, ուր իր ուրախութիւնը յայտնեց այս շրջանի խաղերը Հ.Մ.Ա.Կ.-ի հիմնադրամն 70-ամեակին նւիրւած լինելու կապակցութեամբ: Ելոյթների շարանում արտայայտւեցին Նոր Ջուղայի հայ Մ.Մ. «Արարատ» միութեան Կենտրոնական վարչութեան նախագահ՝ Մասիս Մինասեանը, Հ.Մ.Ա.Կ.-ի վարչութեան ներկայացուցիչ՝ Ռուբինա Գալստեանը եւ Իրանի իսլ. խորհրդարանում Սպահանի եւ հարաւային իրանահայութեան պատգամաւոր Ռոբերտ Բեգլարեանը, որն ի յարգանք պարսիկ հրաւիրեալների ելոյթ ունեցաւ պարսկերէն լեզւով:
Ծրագրի յաջորդ բաժնում մուտք գործեց ջահակիր խումբը իր հետ բերելով Ս. Ամենափրկչեան վանքի շրջափակում գտնւող Ապրիլեան եղեռնի նահատակների յիշատակը յաւերժացնող յուշարձանի կրակով վառած ջահը, որով բոցավառւեց իրանահայ Գարնանային 26-րդ խաղերի ջահը՝ գլխաւոր ջահակիր, բազկամարտի Ասիայի ախոյեան՝ Օշին Տէր-Գրիգորեանի միջոցով: Նշելի է, որ մինչ խաղերի պաշտօնական բացումը, նոյն օրը երեկոյեան ժամը 4:00-ին, ներկայութեամբ ազգային իշխանութեան ներկայացուցիչների, միութեան Կենտրոնական վարչութեան, խաղերի կազմակերպիչ յանձախմբի եւ մարզական միաւորի ներկայացուցիչների, ջահը վառեց եւ օրհնեց թեմակալ առաջնորդ՝ գերշ. Տ. Բաբգէն եպս. Չարեանը եւ այն յանձնեց գլխաւոր ջահակիրին, ով վազքով այն փոխադրեց միութեան կենտրոնատեղի, որին միացան երկրի եւ նահանգի մակարդակում յաջողութիւն արձանագրած բասկետբոլիստուհի՝ Մանէ Յովսէփեանը եւ լողորդուհի Անի Մկրտչեանը: Խոհրդանշական կրակը վառւելուց յետոյ, մարզիկների եւ իրաւարար կազմի ներկայացուցիչների միջոցով կատարւեց երդման կարգը: Դահլիճում ստեղծւած յուզիչ եւ միաժամանակ խանդավառ ու ուրախութեամբ լեցուն մթնոլորտը առաւել խանդավառեցին միութեան Մշակութային միաւորի «Կռունկ» համոյթի ներկայացմամբ գարունը աւետող շքեղ բեմականացումը, պարային համարները եւ համոյթի ու Ս.Ա. Վանքի «Կոմիտաս» երգչախմբի երիտասարդ մենակատարների երգերի կատարումները: Երեկոն աւարտւեց շնորհակալական խօսքերով, ուղղւած՝ բոլոր նրանց, որոնք իրենց համագործակցութիւնն էին ցուցաբերել այս շրջանի խաղերը իրականացնելու գործում եւ յաջողութեան մաղթանքներով ուղղւած՝ մարզիկ-ուհիներին եւ հրավառութեամբ:
Խաղերի փակումը տեղի կունենայ մարտի 25-ին մեդալաբաշխման հանդիսութեամբ:
