Հինգշաբթի եւ ուրբաթ, փետրւարի 27-ին եւ 28-ին, Նոր Ջուղայի հայոց ազգային «Արմէն» երկսեռ տարրական կրթահամալիրի աշակերտ-ուհիները մասնակցելով Սպահան քաղաքի մակարդակում կազմակերպւած «Ռոբոտիկ»-ի մրցոյթին, արժանի կերպով դրսեւորեցին իրենց ունակութիւնը եւ տաղանդը՝ արդիւնքում արձանագրելով բացառիկ յաջողութիւն:

Սոյն մրցոյթին մասնակցել էին 550 աշակերտներ-ուհիներ՝ Սպահան քաղաքի Ուսումնադաստիարակչութեան հիմնարկի տարբեր շրջանների տարրական դպրոցներից, որոնց թւում էին նաեւ «Արմէն» կրթահամալիրի առաջնից հինգերորդ դասարանների աշակերտական խմբերը, ովքեր ռոբոտաշինութեան բարդ գործողութիւնը եւ այս բնագաւառին անհրաժեշտ մասնագիտական գիտելիքներն ու փորձը սերտել էին դպրոցի ռոբոտիկի դասարանների պատասխանատուներ՝ Սիւնէ եւ Արինէ Մինասեանների ջանքերի շնորհիւ: Մրցոյթը կայացաւ երեք տարիքային խմբերի միջեւ:

Առաջին օրը տեղի ունեցաւ ռոբոտաշինութեան մրցոյթը, որտեղ իւրաքանչիւր խումբ իրեն տրամադրւած իրերով ու սարքերով կառուցեց քառոտանի մի ռոբոտ, իսկ յաջորդ օրը սոյն ռոբոտների միջեւ կազմակերպւեց արագասլացութեան մրցոյթ, ուր մասնակից սարքերն ամենակարճ ժամանակահատւածում պէտք է ընթանային շուրջ 160 սանտիմետրանոց տարածութիւնը: Արդիւնքների ամփոփումից յետոյ, «Արմէն» դպրոցի հինգերորդ դասարանի աշակերտներ՝ Վահագն Թահմազեանի, Թադէ Թահմազեանի եւ Մհեր Մինասեանի խմբի ռոբոտը գրաւեց առաջին պատւաւոր տեղը՝ արագասլացութեան մրցոյթում յաջողելով ամենակարճ ժամանակահատւածում անցնել նախատեսւած ճանապարհը: Այս փայլուն յաջողութեան համար նշւած խմբի անդամները պարգեւատրւեցին ոսկէ մեդալներով եւ գնահատագրերով: Ընդհանուրի մէջ «Արմէն» դպրոցի բոլոր աշակերտներն իրենց փայլուն դրսեւորեցին մրցութային երկու օրերի ընթացքում: 

Հարկ է նշել, որ արագասլացութեան մրցոյթում առաջինը հանդիսացած ռոբոտի եւ միւս սարքերի միջեւ արձանագրւած ժամանակի տարբերութիւնը բաւականին շօշափելի էր, ինչի համար մրցոյթի կազմակերպիչները, իրաւարարներն ու հանդիսատեսն արտայայտեցին իրենց հիացմունքն ու գնահատական խօսքերը:

Յաջողութիւն ցանկանալով «Արմէն» տարրական կրթահամալիրի ժրաջան աշակերտներին եւ պատասխանատուներին՝ մաղթում ենք նրանց նորանոր նւաճումներ ու ձեռքբերումներ: