Սպահանի հայոց թեմի Քրիստոնէական դաստիարակութեան խորհրդի նախաձեռնութեամբ հինգշաբթի՝ 2018 թւականի փետրւարի 1-ի երեկոյեան, Նոր Ջուղայի Հայ Մ. Մ. «Արարատ» միութեան սրահում տեղի ունեցաւ դասախօսական երեկոյ:
Սկզբում բացման խօսքն ընթերցեց երեկոյի հաղորդավար՝ Քրիստոնէական դաստիարակութեան խորհրդի անդամ Թովմա Գալստանեանը: Ահա մի հատւածի մէջբերում սոյն խօսքից.
«Քրիստոնէական դաստիարակութեան խորհուրդն իր գործունէութեան ընթացքում ամենամեայ դրութեամբ տեղ է յատկացրել դասախօսական ձեռնարկներին, որոնք նպատակ ունեն առօրեայի ամենակարեւոր երեւոյթներն ու հարցերն երբեմն յիշեցնել եւ դէպի զգաստութիւն ու արթնութիւն մղել բոլորիս, որպէսզի յանկարծ կամ էլ չզգացւող դանդաղ ընթացքով մեզ չտեսնենք արհաւիրքի ու տագնապի ճահճի մէջ թաղւած»:
Բացման խօսքին յաջորդեց Սպահանի հայոց թեմի առաջնորդ գերպ. Տ. Սիփան ծ. վրդ. Քէչէճեանի հայրական պատգամը: Նա նշելով, որ յոյս ունէր սրահում տեսնել աւելի մեծաթիւ երիտասարդների, ընդգծեց, թէ երիտասարդները վտանգների առջեւ են կանգնում հենց իրենց դրսեւորած անտարբերութեան պատճառով: Հայր Սուրբն, անդրադառնալով նաեւ այն փաստին, որ մեր օրեայ պայմաններում ծնողներից ոմանք հարկ եղած ուղղութիւնները չեն տալիս իրենց զաւակներին, ներկաներին կոչ արեց՝ լաւապէս ունկնդրել երեկոյի ընթացքում հնչող խրատներին ու միջոցներին եւ դրանք տարածել:
Առաջին զեկուցաբերն էր Շահինշահրի հայ համայնքի հոգեւոր տեսուչ գերպ. Տ. Անանիա ծ. վրդ. Գուճանեանը, ով իր դասախօսական ելոյթը ծաւալեց «Մարդու կեանքում հոգեւորի անհրաժեշտութիւնը» թեմայի շրջագծում: Նա անդրադառնալով հոգեւոր կեանքի ներքին, արտաքին եւ հաւաքական կարգապահութեանը, ընդգծեց այն դրական կէտերը, որոնք արդիւնքն են Բարձրեալի հետ հաղորդակցւելու: Նա իր ելոյթում անդրադարձ ունեցաւ նաեւ հոգեւոր կեանքի բացակայութեան վտանգներին ու աղօթքի կարեւորութեանը:
Յաջորդ ելոյթը դոկտ. Մոհամադ Ռեզա Միրզայիի (էնդոկրինոլոգ-فوق تخصص غدد) դասախօսութիւնն էր՝ «Կանխահաս արբունքի պատճառներն ու վնասները» խորագրով: Այս ծիրում մասնագէտն անդրադարձ ունեցաւ արբունքից առաջացող հոգեկան վիճակին եւ ֆիզիքական փոփոխութիւններին ու կանխահաս արբունքի պատճառներին: Դասախօսը նշեց նաեւ այն բուժումներն ու բժշկական միջամտութիւնները, որոնք կիրառւում են ժամանակից շուտ կամ ուշ արբունքի հասնող անհատների նկատմամբ:
Վերջում դոկտ. Ռամին Ռադֆարը, ով աւելի քան 15 տարւայ փորձառութիւն ունի թմրեցուցիչ նիւթերի մասին ուսումնասիրութեան եւ թմրամոլների բուժման շրջագծում, խօսեց «Թմրամոլութեան դրտապատճառներն ու կանխարգելման միջոցները» թեմայի մասին: Նա իր ելոյթում բացատրեց՝ թմրամոլի բարոյական եւ ֆիզիքական յատկանիշների, թմրանիւթի օգտագործումը կանխարգելելու ուղղութեամբ ընտանիքների դերի եւ հասարակութեան մէջ երիտասարդին սպառնացող վտանգների կապակցութեամբ:
Յատկանշական է, որ իւրաքանչիւր թեմայի աւարտին դասախօսները պատասխանեցին ներկաներին յուզող հարցերին:
Երեկոյին ներկայ էին նաեւ քահանայից դասի եւ ազգային մարմիների ներկայացուցիչներ ու ժողովուրդ:
Թղթակից (Նոր Ջուղա)
