Չորեքշաբթի՝ 3 յունւար 2018 թւականին Իսլամական Մշակոյթի եւ Առաջնորդութեան Սպահանի գերատեսչութեան ներկայացուցիչները, գլխաւորութեամբ՝ հոջ. Մոհամմադ Ալի Անսարիի, այցելեցին Ս. Ա. Վանք:

Հիւրերին դիմաւորեցին Սպահանի հայոց թեմի առաջնորդ՝ գերպ. տ. Սիփան ծ. վրդ. Քէչէճեանը, Պատգամաւորական ժողովի դիւանի անդամ Գեղարդ Մանսուրեանը, Թեմական եւ Կրօնական խորհուրդների ատենապետներ Վարուժ Մինասեանը եւ Վարուժ Մովսիսեանը, երկու խորհուրդների անդամները եւ Նոր Ջուղայի Հայ Դատի յանձնախմբի ներկայացուցիչ Վահէ Թորոսեանը:

Գերատեսուչ հոջ. Անսարին շնորհաւորելով Ամանորը եւ Ս. Ծնունդը, նշեց. «Այսօր առիթ ընձեռւեց թէ՛ Ամանորի եւ Ս. Ծննդեան տօների առիթով եւ թէ՛ այն պատճառով, որ դուք նախապէս այցելութեան էք եկել մեզ մօտ, մենք եւս այցելենք Ս. Ա. Վանք: Յոյս ունենք, որ միշտ մեր հայ հայրենակիցների կողքին ապրելու ենք ուրախ եւ լաւ պայմաններում: Բարեբախտաբար Սպահանում կայ այն առիթը, որպէսզի Միաստւածեան կրօնների հետեւորդները համախմբւած եւ խաղաղ ապրեն մի վայրում»:

Գերպ. տ. Սիփան ծ. վրդ. Քէչէճեանը ողջունեց եւ բարի գալստեան խօսք ուղղեց ներկաներին: Նա նշեց. «Այս հանդիպումը մեզ համար ոչ միայն փոխադարձ, այլ նաեւ շատ բաղձալի եւ սպասւած հանդիպում է ու թէեւ Ամանորեայ օրերին բազմաթիւ հանդիպումներ ենք ունեցել, սակայն որոշ հանդիպումներ առաւել նշանակալի են, ինչպէս նահանգապետի, քաղաքապետարանի եւ Իսլամական Մշակոյթի եւ Առաջնորդութեան գերատեսչի՝ Ձեր այցելութիւնը: Հայր Սուրբը շեշտեց որ թէեւ ընդունւած է իրանահայութեանն անւանել իբրեւ երկրի կրօնական փոքրամասնութիւններից մէկը, սակայն մենք մեզ որպէս փոքրամասնութիւն չենք վերաբերւում, այլեւ  մեզ համարում ենք, որպէս այս երկրի եւ այս ժողովրդի անբաժանելի մի մասնիկը եւ լիիրաւ քաղաքացիներ»:

Հանդիպման աւարտին հիւրերին յանձնւեցին նւէրներ եւ տեղի ունեցաւ հիւրասիրութիւն: