Երեքշաբթի՝ 2017 թւականի ապրիլի 4-ի միջօրէին, Հունգարիայի վարչապետի տեղակալ Ժոլթ Շամինը, իրեն ընկերակից ունենալով Հունգարիայի Ազգային ժողովի փոխ-ատենապետ Եանոշ Լաթորսայիին, Հունգարիայի քաղաքական ու տնտեսական մի քանի բարձրաստիճան պատասխանատուների, Իրանում Հունգարիայի արտակարգ եւ լիազօր դեսպան Եանոշ Քովաչին, այցելեց Ս. Ամենափրկչեան վանք, այցելեց «Ս. Յովսէփ Արեմաթացի» եկեղեցի եւ «Խաչատուր Կեսարացի» թանգարան, ապա Ազգային առաջնորդարանի Ծաղկեայ դահլիճում տեսակցութիւն ունեցաւ Սպահանի հայոց թեմի կաթողիկոսական փոխանորդ գերպ. Տ. Սիփան ծ. վրդ. Քէչէճեանի, Պատգամաւորական ժողովի փոխ-ատենապետ Մկրտիչ Աւետումեանի, Թեմական ու Կրօնական խորհուրդների ատենապետեր Վարուժ Մինասեանի եւ Վարուժ Մովսիսեանի եւ Հայ Դատի յանձնախմբի Նոր Ջուղայի գրասենեակի ներկայացուցիչ Վահէ Թորոսեանի հետ:
Հանդիպման սկզբում գերպ. Հայր Սուրբն ուրախութեամբ ողջունեց հիւրերի ներկայութիւնը, եւ համապարփակ կերպով բացատրեց Իրանում ապրող հայութեան, Սպահանի հայոց թեմի կացութեան եւ պետական մակարդակի յարաբերութիւնների մասին, միաժամանակ ընդգծելով քաղաքի, նահանգի եւ երկրի բոլոր պատասխանատուների բարի վերաբերմունքը՝ հայութեան նկատմամբ:
Գերպ. Տ. Սիփան ծ. վրդ. Քէչէճեանը յուշելով 2012 թւականին Հունգարիայում կազմակերպւած ռազմա-ուսուցողական ծրագրի ընթացքում ադրբեջանցի Սաֆարովի միջոցով հայ սպայի կացնահարման եւ սպանման պարագան, իր զարմանքն ու վրդովմունքը յայտնեց Հունգարիայի կառավարութիւնից՝ ոճրագործին Ադրբեջանին յանձնելու համար, որի արդիւնքում նա ոչ միայն իրեն արժանի պատիժը չկրեց, այլ Ադրբեջանի կառավարութեան կողմից ճանաչւեց իբրեւ «ազգային հերոս»: Գերպ. Հայր Սուրբը մատնանշելով այս դէպքը եւ շեշտելով, որ դա ապացուցում եւ պարզում է թրքական հայատեաց կեցւածքն ու անարդար քաղաքականութիւնը, առիթն օգտագործելով դիմեց յարգելի հիւրերին՝ իրենց հնարաւորութիւններն ի գործ դնելու՝ Հունգարիայում Հայոց ցեղասպանութեան ճանաչման ուղղութեամբ:
Հանդիպման ընթացքում, Պրն. Շամինը, նախ շնորհակալութիւն յայտնեց պատւիրակութեանն ընդունելու եւ ջերմ հիւրընկալութեան համար, ապա բացատրելով Հունգարիայում հայ համանքի ներկայութեան շուրջ չորս դարեայ վաղեմութեան մասին, նշեց, թէ գիտական, կրթական, արհեստի եւ արւեստի զանազան բնագաւառներում Հունգարիայի հայերը նշանաւոր գործիչներ են ունեցել, որոնք նպաստել են սոյն երկրի վերելքին եւ իբրեւ հզօր համայնք ջերմ յարաբերութիւն են մշակել պետութեան հետ: Իր արտայայտութիւնների շարունակութեան մէջ Պրն. Շամինը ցաւով անդրադարձաւ 2012 թւականին կատարւած դէպքին եւ անձամբ իր դժգոհանքը յայտնեց Ադրբեջանի որդեգրած քայլի վերաբերեալ եւ շեշտեց, որ այդ կապակցութեամբ Ադրբեջանը կատարել է Հունգարիայի պետութեան եւ դատական մարմիններին պաշտօնապէս տւած իր գրաւոր խոստման հակառակը, որի արդիւնքում խոր անջատում է տեղի ունեցել Հունգարիայի պետութեան եւ հայ համայնքի միջեւ, ինչը ցանկալի երեւոյթ չէ:
Պրն. Շամինը կարեւորեց Հունգարիայի պետութեան եւ հունգարահայ համայնքի միջեւ յարաբերութիւնների վերականգնումը եւ շեշտեց, որ իր ներկայացրած դեմոկրատական կուսակցութիւնն ու իրեն ընկերակցող անձինք կողմ են Հունգարիայի կողմից Հայոց ցեղասպանութեան ճանաչմանը եւ այդ ուղղութեամբ հետեւողական աշխատանք են իրականացնում:
