2017 թւականի մարտի 11-ի երեկոյեան, Ն. Ջ. Հայ Մ. Մ. «Արարատ» միութեան Մշակութային միաւորի «Կռունկ» պարախումբը, ղեկավարութեամբ պարուսոյց Նունէ Մկրտչեանի, նոյն միութեան հանդիսութիւնների դահլիճում հանդէս եկաւ տարեկան ելոյթով: Ծրագրի սկզբում հանդիսատեսին ողջունեց հանդիսավարուհի Սօսէ Ասատրեանը, ով բնութագրելով պարը որպէս մարդկային հոգու, յոյզերի ու ապրումների դրսեւորում, հակիրճ կերպով ներկայացրեց «Կռունկ» պարախմբին եւ պարուսոյցին՝ ամփոփ զեկոյց ներկայացնելով Իրանում եւ արտերկրում իրականացրած խմբի յաջող ելոյթների մասին, որից յետոյ պարախմբի կրտսեր եւ աւագ սաները հանդէս եկան հայ եւ օտար ազգերի, ինչպէս նաեւ ժամանակակից եւ մանկական պարային 24 գեղեցիկ եւ անթերի խմբական կատարումներով եւ մենապարերով, որոնք արժանացան հանդիսատեսի բուռն ծափողջոյններին:
Ծրագիրը եզրափակւեց խանդավառ երաժշտութեան ներքոյ՝ բոլոր մասնակիցների բեմ ելնելով եւ խմբի ղեկավարին բեմ հրաւիրելով, ով արտայայտեց շնորհակալական խօսքեր՝ ուղղւած միութեան Կենտրոնական եւ Մշակութային միաւորի վարչութիւններին, խմբի անդամներին եւ ծնողներին, որոնց համագործակցութեան շնորհիւ իրականացաւ երեկոն: Նունէ Մկրտչեանը շնորհակալութիւն յայտնեց նաեւ ազգային իշխանութեանը եւ հանդիսատեսին՝ միջոցառմանը ներկայ լինելու եւ խրախուսելու համար:
Երեկոյի եզրափակիչ խօսքը վերապահւած էր Սպահանի հայոց թեմի կաթողիկոսական փոխանորդ՝ գերպ. Տ. Սիփան ծ. վրդ. Քէչէճեանին: Հայր Սուրբը նախ իր ուրախութիւնը յայտնեց Նոր Ջուղա վերադառնալու կապակցութեամբ եւ խոստովանեց, որ իր միամսեայ բացակայութեան ընթացքում ապրել է կարօտի զգացում՝ հանդէպ Նոր Ջուղայի: Անդրադառնալով «Կռունկ» համոյթի իրականացրած ելոյթին, բարձր գնահատեց այն եւ արժեւորեց այսպէս. ««Կռունկ»-ի կատարումները իմ մտքի, հոգու եւ սրտի մէջ կաթիլ առ կաթիլ սրսկեցին հայ մշակոյթի աւիւնը՝ վերաթարմացնելով եւ վերաշխուժացնելով իմ ներաշխարհը: Եթէ հայ բանակայինները պաշտպանում են հայրենիքը, «Կռունկ» համոյթը «Արարատ» միութեան հովանու ներքոյ պայքարում է հայ մշակոյթի պահպանման համար. այն անցել է յաջողութեան սահմանները եւ գնում է դէպի մասնագիտութիւն»: Հայր Սուրբը իր խօսքի շարունակութեան մէջ շնորհաւորանքի եւ քաջալերանքի խօսք ասաց Մշակութային միաւորի վարչութեանը եւ պարախմբին՝ արական խմբի վերականգնման կապակցութեամբ: Գնահատանքի եւ շնորհաւորանքի խօսքեր ուղղեց նաեւ միութեան պատասխանատուներին, պարուսոյցին, պարախմբի անձնակազմին եւ բոլոր նրանց, որոնց համագործակցութեամբ իրականացաւ ծրագիրը:
Հանդիսատեսը գոհունակութեամբ եւ տպաւորութիւններով լեցուն թողեց դահլիճը:
