Սպահանի հայոց թեմի 16-րդ նստաշրջանի Պատգամաւորական ժողովի եւ Շահինշահրի Հայ Համայնքի վարչութեան 10-րդ շրջանի Ընտրական յանձնախմբի կազմակերպութեամբ եւ համայնքի հոգեւոր տեսուչ Տ. Անանիա ծ. Վրդ. Գուճանեանի ներկայութեամբ, հինգշաբթի՝ 2017 թ. փետրւարի 16-ի երեկոյեան ժամը 7:30-ին, Շահինշահրի «Սրբոց Վարդանանց» դպրոցի  սրահում, համայնքի 10  թեկնածուները հանդիպեցին ժողովրդի հետ: Թեմիս Պատգամաւորական ժողովի ընտրութեանը իրենց թեկնածութիւնն էին առաջադրել 3, իսկ Համայնքի վարչութեանը՝ 7 թեկնածուներ՝ հետեւեալ ընտրացանկով ըստ այբբենական կարգի.

Պատգամաւորական ժողովի թեկնածուներ՝

1.Թորոսեան Մելինէ

2.Յարութիւնեան Վիոլետ

3.Քեշիշեան Մառիթա

Հայ Համայնքի վարչութեան թեկնածուներ՝

1.Բաբումեան Էդւին

2.Թահմազեան Ջանիկ

3.Թահմազեան Ստեփանոս

4.Թորոսեան Ռայմոնդ

5.Հախնազարեան Արմոնդ

6.Միրզախանեան Գառնիկ

7.Շիրւանեան Մելքոն

Ծրագրի համաձայն, սկզբում թեկնածուներն առանձնաբար ներկայացրին իրենց կենսագրականն ու ծրագրերը, ապա երկրորդ բաժնում պատասխանեցին ներկաներին յուզող հարցերին:  

Հանդիպումը վարեցին Ընտրական յանձնախմբի ներկայացուցիչներ՝ պրն. Եղիշ Աղախանեանը եւ տկնյք. Վարդուհի Պօղոսեանն ու Էմմա Օրդուբէգեանը: 

Հանդիպման աւարտին իր եզրափակիչ խօսքով հանդէս եկաւ գերպ. Հայր Սուրբը, ով իր կոչն ուղղելով ներկաներին՝ հրաւիրեց բոլորին միասնական եւ միահամուռ մասնակցեն ընտրութիւններին՝ ի շահ Թեմի եւ հետեւաբար համայնքի բարգաւաճմանն ու բարօրութեանը:

Յատկանշելի է, որ Հայ Համայնքի Վարչութեան նախաձեռնութեամբ՝ «Սրբոց Վարդանանց» դպրոցի շրջափակում ստեղծւել են հնարաւորութիւններ, որպէսզի բոլոր թեկնածուները հաւասարապէս կարողանան օգտագործել դրանք՝ իրենց քարոզարշաւը կազմակերպելու համար:

Նշեալ երկու  ընտրութիւններն էլ կայանալու են ուրբաթ՝ փետրւարի 24-ին՝ «Սրբոց Վարդանանց» դպրոցի շրջափակում: