Ամանորեայ եւ Ս. Ծննդեան տօների առիթով, երեքշաբթի՝ 2017 թւականի յունւարի 3-ի առաւօտեան ժամը 8:00-ին, Շահինշահրի Ուսումնա-դաստիարակչութեան հիմնարկի պատասխանատուները եւ պաշտօնատարները շնորհաւորագրով եւ քաղցրաւենիքով այցելեցին Շահինշահրի «Սրբոց Վարդանանց» եւ «Մասիս» դպրոցներ եւ տեսակցութիւն ունեցան համայնքի հոգեւոր տեսուչ՝ Տ. Անանիա ծ. վրդ. Գուճանեանի, Վարչութեան անդամների, դպրոցների տեսչութեան եւ ուսուցչական կազմերի հետ:
Իբրեւ սկիզբ զոյգ դպրոցի տեսուչ պրն. Ղոջավանդը բարիգալուստ մաղթելով այցելու պատւիրակութեանը՝ ներկայացրեց նրանց դպրոցի անձնակազմին ու աշակերտներին:
Յաջորդիւ Ամանորեայ գեղեցիկ ողջոյնի խօսքով հանդէս եկաւ վերոնշեալ հիմնարկի տնօրէն պրն. Քամալը, ով իր անհուն ուրախութիւնն յայտնեց այս բարեբաստիկ տօների կապակցութեամբ, եւ հիացմունքով արտայայտւեց զոյգ դպրոցի բարեկարգ վիճակի, կարգապահութեան եւ աշակերտների ջանասիրութեան ու խելամտութեան մասին: Նա գոհունակութեամբ յայտնեց, թէ այսպիսի օրինակելի դպրոց ունենալը մեծ պարծանք է շրջանի կրթադաստիարակչութեան համար: Ապա իր բարեմաղթանքն ուղղելով բոլոր ներկաներին ցանկացաւ խաղաղ, համերաշխ ու նորանոր յաջողութիւններով լի տարի:
Այնուհետեւ գերպ. Հայր Սուրբի խօսքը եզրափակեց օրւայ արտայայտութիւնների պաշտօնական բաժինը, ով իր հայրական օրհնանքն ուղղելով բոլոր ներկաներին իր ուրախութիւնն ու շնորհակալութիւնն յայտնեց պաշտօնական հիւրերին, ովքեր իրենց ներկայութեամբ այս գեղեցիկ տօների ընթացքում՝ առաւել հրճւանք ու շուք հաղորդեցին կրթադաստիարակչական միջավայրին:
Հայր Սուրբն իր եւ համայնքի Վարչութեան անունից բարձր գնահատեց շրջանի կրթադաստիարակչութեան բարեացակամութիւնը հայոց ազգային դպրոցների, պատասխանատուների եւ հայ աշակերտների նկատմամբ: Նա դրւատեց սոյն հիմնարկի պաշտօնատարների հետեւողականութիւնն ու ցուցաբերած հոգատարութիւնը, ովքեր նոյնիսկ աշակերտութեան թւի զգալի նւազեցմամբ հանդերձ, երբեք չեն խնայում իրենց հովանաւորութիւնն ու համագործակցութիւնը՝ յօգուտ աշակերտների մտաւոր զարգացման եւ ուսումնա-դաստիարակչական առաջադիմութեան: Հայր Սուրբը բոլոր ներկաներին մաղթեց արեւշատութիւն, յաջողութիւն եւ աղօթեց առ Աստւած, որ 2017 թւականը համայն մարդկութեանը պարգեւի խաղաղութիւն, համերաշխութիւն եւ առաջադիմութիւն:
Օրւայ առիթով նախատեսւել էր համեստ հիւրասիրութիւն, որի ընթացքում պատւիրակութիւնը՝ գերպ. Հայր Սուրբի, համայնքի Վարչութեան ներկայացուցիչների եւ դպրոցի տեսչութեան հետ անցաւ խորհրդակցութիւնների՝ դպրոցի կրթադաստիարակչական մի շարք խնդիրների վերաբերեալ:
Դրական ու օգտաշատ որոշումներ ընդունելուց յետոյ, ներկաները լուսանկարւեցին եւ այցելեցին նաեւ դասարանները՝ աշակերտների հետ աւելի մտերմիկ մթնոլորտում շփւելու համար, եւ նորանոր ձեռքբերումներ մաղթելով նրանց հրաժեշտ տւեցին:
