2017 թւականի յունւարի 1-ի առաջին պահերին՝ ժամը 00:50-ին, Ս. Ամենափրկչեան վանքի «Ս. Յովսէփ Արեմաթացի» եկեղեցում, հաւատաւոր հայորդիների ներկայութեամբ, Կաթողիկոսական փոխանորդ գերպ. Տ. Սիփան ծ. վրդ. Քէչէճեանի նախագահութեամբ եւ Շահինշահրի հայ համայնքի հոգեւոր տեսուչ գերպ. Տ. Անանիա ծ. վրդ. Գուճանեանի, հոգեւորականաց ու դպրաց դասերի մասնակցութեամբ, Գոհաբանական աղօթք մատուցւեց Ամանորի առթիւ:
Արարողութեան ընթացքում Ս. Սեղանի վրայ վառւող մոմից լոյս իջեցւեց եւ դրանով վառւեցին ներկայ հաւատացեալներին բաժանւած մոմերը՝ լուսաւորելով եկեղեցու խորհրդաւոր տարածքը. ներկաները միասնաբար երգելով «Տէ՜ր, ողորմեա՜» հոգեզմայլ աղօթքը, մաղթեցին, որ ամբողջ նոր տարւայ ընթացքում խաղաղութիւնը ուղեկցի համայն աշխարհին:
Կաթողիկոսական փոխանորդ Հայր Սուրբը Գոհաբանական մաղթանքից յետոյ իր շնորհաւորանքի խօսքը փոխանցեց բարեպաշտ ժողովրդին, աշխարհին խաղաղութիւն ու անդորրութիւն եւ համայն մարդկութեանը երջանկութիւն մաղթելով: Գերպ. Հայր Սուրբը գնահատեց ներկաներին, ովքեր իրենց Նոր տարին յաջողութեամբ պսակելու համար՝ Տիրոջ տուն գալով Աստծու օրհնութիւնն ու առաջնորդութիւնն են հայցել:
Արարողութիւնից յետոյ, վանքի բակում բազմահարիւր հայորդիների ներկայութեամբ, տօնական երաժշտութեան ներքոյ տեղի ունեցաւ հրավառութիւն եւ հիւրասիրութիւն, որի ընթացքում բոլորն առիթ ունեցան տօնը միմեանց շնորհաւորելու եւ բարեմաղթանքներ կատարելու:
Յունւարի 1-ի առաւօտեան ժամը 11:00-ին, Ամանորի առթիւ սուրբ եւ անմահ Պատարագ մատուցւեց դարձեալ «Ս. Յովսէփ Արեմաթացի» եկեղեցում: Պատարագիչն էր թեմի Կաթողիկոսական փոխանորդ գերպ. Տ. Սիփան ծ. վրդ. Քէչէճեանը: Արարողութեանը ներկայ եղան նաեւ Շահինշահրի հայ համայնքի հոգեւոր տեսուչ գերպ. Տ. Անանիա ծ. վրդ. Գուճանեանը, հոգեւորականց եւ դպրաց դասերը, հաւատաւոր հայորդիներ, իսկ Ս. Պատարագի երգեցողութիւնը կատարեց Ս. Ա. Վանքի «Կոմիտաս» երգչախումբը:
Գերպ. Հայր Սուրբը Ս. Պատարագի ընթացքում քարոզի պահին նշելով, որ տարին փոխւելով հաշւետւութիւն պէտք է կատարել թէ ինչ ենք թողնում անցեալում եւ ինչ ենք ծրագրում ապագայի համար, ասաց. «Նոր տարւայ նախօրեակին կանգնած, փորձենք ոչ միայն դիտել մեր կեանքի անցեալն ու ընթացքը, այլեւ մանաւանդ մեր ճիգերով, անշեղ որոշումներով ու անյետադարձ կամքով ընտրել թէ ի՛նչ ենք մեռցնելու մեր մէջ հին տարւայ հետ ու ինչի՛ն ենք ծնունդ տալու Նոր տարւայ հետ: Եթէ փափագում ենք լաւագոյն արդիւնքների հասնել, ուրեմն նախ մեր մէջ բռնկեցնենք ու վառ պահենք մեր հաւատքն ու յոյսը , ապա հին տարւայ հետ մեր մէջ սպանենք չարը, վատը, մոլութիւններն ու մեղքերը եւ նրանց փոխարէն նոր տարւայ հետ մեր մէջ յարութիւն տանք բարուն, լաւին, առաքինութիւններին ու բարեգործութեանը, որպէսզի սրբագրենք մեր անցեալը, նոր մարդ դառնանք եւ լուսաւոր կաղանդի դիմաւորութեամբ ընթանանք դէպի մարդկային տիպար կերպարը, այն գոհունակութեամբ թէ` մեռաւ մեր մէջ հին մարդը եւ նրա փոխարէն ծնունդ առաւ աստւածահաճոյ նոր մարդ»:
Ս. Պատարագի ընթացքում տարւայ առաջին Ս. Հաղորդութիւնն ստացան հոգեւորականաց եւ դպրաց դասերն ու ներկայ հաւատացեալները, իսկ արարողութիւնից յետոյ, Ս. Ա. վանքի Ծաղկեայ դահլիճում պատարագիչ Հայր Սուրբն ընդունեց Ամանորեայ շնորհաւորանքներ, ուր «Կոմիտաս» երգչախումբն իր ամանորեայ շնորհաւորանքն ընթերցեց, ապա արտայայտւեց Սպահանի հայոց թեմի Թեմական խորհրդի ատենապետ Վրէժ Տէր-Մարտիրոսեանը՝ համառօտ հաշւետւութիւն ներկայացնելով անցնող տարւայ ընթացքում համայնքի ձեռքբերումների մասին:
Գերպ. Հայր Սուրբն իր շնորհաւորանքները փոխանցեց, բարի ու արդիւնաւոր գործունէութիւն ցանկացաւ ազգային, կրօնական, կրթական, մշակութային, հասարակական եւ բոլոր ասպարէզներում, իսկ համայնքի բոլոր անդամներին մաղթեց արեւշատութիւն եւ առողջութիւն:
