Շաբաթ՝ նոյեմբերի 5-ի երեկոյեան, Սպահանի հայոց թեմի Կրթական խորհրդի կազմը նախօրօք ժամադրութեամբ ծանօթացման հանդիպում ունեցաւ թեմի կաթողիկոսական փոխանորդ գերպ. Տ. Սիփան ծ. վրդ. Քէչէճեանի հետ: Հանդիպմանը ներկայ էր նաեւ Թեմական խորհրդի կողմից Կրթական խորհրդի հետ նշանակւած կապ դոկտ. Վաչիկ Հայրապետեանը:
Սկզբում Կրթական խորհրդի անունից ողջոյնի խօսք արտայայտեց ատենապետուհի Սաթենիկ Աւետումեանը, բարի գալուստ յայտնելով եւ շնորհաւորելով գերպ. Հայր Սուրբին` թեմի կաթողիկոսական փոխանորդի պաշտօնում նշանակւելու կապակցութեամբ:
Այնուհետեւ բացատրութիւններ տրւեցին Կրթական խորհրդի գործունէութեան սահմանների եւ բնոյթի մասին, անդրադարձ եղաւ հայոց դպրոցների հետ կապւած ընդհանուր իրավիճակին ու խնդիրներին, յատկապէս նշւեց Շահինշահրի եւ Նոր Ջուղայի աշակերտութեան թւի նւազման հետեւանքով դպրոցներում կատարւած դասաւորութիւններն ու մտահոգութիւնները, ինչու չէ նաեւ այդ շրջագծում ուսումնադաստիարակութեան հիմնարկի հետ փոխ-յարաբերութիւններն ու խորհրդի կողմից ներկայացւած առաջարկները եւ նախատեսւած ծրագրերը:
Գերպ. Տ. Սիփան ծ. վրդ. Քէչէճեանն ուշի ուշով ականջալուր եղաւ փոխանցւած բացատրութիւններին, եւ կարեւորելով հայոց դպրոցների խնդիրները, իր հերթին մի շարք լուծումներ ներկայացրեց դրանց կապակցութեամբ: Հանդիպման շարունակութեան մէջ խօսակցութիւն ծաւալւեց “Կրօն” առարկայի դասագրքերի մշակման եւ հրատարակութեան շուրջ ու գործնական համադրութիւններ եւ դասաւորութիւններ կատարւեցին այդ ուղղութեամբ:
