Իսլ. խորհրդարանում Սպահանի եւ Հարաւային իրանահայութեան վերջին երեք նստաշրջանների պատգամաւոր Ռոբերտ Բեգլարեանն իր գործունէութեան ժամանակաշրջանի աւարտին, հինգշաբթի՝ մայիսի 26-ի առաւօտեան ժամը 10:30-ին, որպէս պատգամաւոր իր վերջին այցը կատարեց Նոր Ջուղայի հայոց ազգ. ծերանոց:
Պրն. Բեգլարեանն անցնող 12 տարիների ընթացքում յատուկ հոգածութիւն եւ ուշադրութիւն է ցուցաբերել Նոր Ջուղայի հայոց ազգ. ծերանոցի նկատմամբ եւ որեւէ ջանք չի խնայել դրան նիւթա-բարոյական օժանդակութիւն ցուցաբերելու հարցում:
Ծերանոցի յարկի տակ պատգամաւորին ջերմ դիմաւորեցին սոյն կենտրոնը հիմնադրող եւ ղեկավարող հաստատութեան՝ Ն. Ջ. Հայ Կանանց Գթութեան միութեան նախկին եւ նորընտիր վարչութիւնների անդամները, ինչու չէ նաեւ ծերանոցի տարեց բնակիչներն ու աշխատակազմը:
Հանդիպման ընթացքում Կանանց Գթութեան միութեան վարչութեան նախագահուհի Արմինէ Սիմոնեանն իր խորին շնորհակալութիւնները յայտնեց պրն. Բեգլարեանին, առ այն, որ այս տարիների ընթացքում միշտ լինելով ծերանոցի կողքին, ոչ միայն իր նիւթա-բարոյական օժանդակութիւնն է ցուցաբերել կենտրոնի բարգաւաճման եւ տարեցների բարօրութեան համար, այլեւ իր կառուցողական խորհուրդներով նեցուկ է հանդիսացել միութեանը` ծերանոցի ղեկավարման հարցում, ինչպէս նաեւ պետական մակարդակով առաջացած խնդիրներին առաւել դիւրին լուծում տալու կապակցութեամբ:
Ռոբերտ Բեգլարեանը ուրախութեամբ նշեց այն փաստը, որ մշտապէս վայելել է Կանանց Գթութեան միութեան անդամուհիների, ծերանոցի բնակիչների եւ աշխատակազմի յարգանքը, ապա յոյս յայտնեց՝ ապագայում նոյնպէս լինելով միութեան եւ ծերանոցի կողքին՝ իր հնարաւորութիւնների սահմաններում դարձեալ օժանդակութիւն է ցուցաբերելու նրանց:
Այնուհետեւ հանդիպումը շարունակւեց համեստ հիւրասիրութեամբ, որի ընթացքում ի երախտագիտութիւն պրն. Բեգլարեանի կատարած ծառայութիւնների, միութեան անունից յուշանւէր յանձնւեց յիշեալին, ապա մտերմիկ զրոյցի ներքոյ, նորընտիր վարչութեան անդամուհիներն առիթ ունեցան ծերանոցին առնչւող մի շարք հարցերի շուրջ խորհրդակցել պատգամաւորի հետ:
