Հինգշաբթի` մայիսի 13-ի երեկոյեան, Ն. Ջ. Հայ Մ. Մ. «Արարատ» միութեան դահլիճում, հանդիսութեամբ նշւեց միութեան Երէցների միաւորի հիմնադրման եւ գործունէութեան 25-ամեակը: Երեկոյի սկզբում ներկաներն էկրանի վրայ ցուցադրւող պատկերների եւ կազմակերպւած ցուցահանդէսի միջոցով հաղորդւեցին 25-ամեայ միաւորի անցեալի ու ներկայի հետ:

Երեկոյի պաշտօնական բաժնում բացման խօքով հանդէս եկաւ օրւայ հանդիսավարուհի` Միգանուշ Տէր-Մարտիրոսեանը, ապա Երէցների միաւորի վարչութեան խօսքն ընթերցեց Հիլդա Ծառուկեանը:

Օրւայ առթիւ հրաւիրւած էր բանախօսելու ազգային-հասարակական վաստակաւոր գործիչ եւ միութեան արտօնատէր Թաթուլ Օհանեանը, ով լաւատեղեակ լինելով Երէցների միաւորի կազմաւորման գործընթացին, ինչպէս նաեւ ծաւալած բեղուն գործունէութեանը, իր բանախօսութեան առանցքը դարձրեց նոյն թեման: Միութեան արտօնատէրը, մինչ բուն թեմային անցնելը ողջունելով միաւորի 25-ամեակի առթիւ կազմակերպւած յոբելենական ձեռնարկը՝ տարւայ ընթացքում կազմակերպւած բոլոր յոբելենական ձեռնարկները համարեց երախտագիտութեան ամենագեղեցիկ արտայայտութիւններից մէկը: Ապա պատմական ակնարկով բնութագրեց միաւորի կազմաւորման ընթացքը եւ անցած ուղին, նշելով, որ «Գարնանային խաղերի սկզբնական շրջանում վաստակ ունեցող միութենականներից կազմւեց մի խումբ, որը ժամանակի դժւարին ու աննպաստ պայմաններում ստանձնեց Գարնանային խաղերի հիւրընկալման պատասխանատւութիւնը: Հետագային այդ խումբը դարձաւ մի հրաշալի կորիզ, որի շուրջ ձեւաւորւեց Երէցների միաւորը. միաւոր, որի անդամ-ուհիների ամենօրեայ ներկայութեամբ ու ծաւալած գործունէութեամբ, ինչպէս նաեւ միւս միաւորների հետ համընթաց քայլելով՝ մեծ նշանակութիւն ունեցաւ միութեան համար»։ Բանախօսը կարեւորութեամբ ընդգծեց այն հանգամանքը, որ Երէցների միաւորն առաջնորդւելով ներքին կանոնագրով եւ ունենալով բաժանմունքներ ու խմբակներ, աշխատել է 25 տարի եւ նիւթա-բարոյական մեծ աջակցութիւն է ցուցաբերել «Արարատ» միութեանը: Նա կարեւորութեամբ ընդգծեց Հայ Դատի պահանջատիրական ասպարէզում տարւող աշխատանքներին միաւորի մասնակցութիւնը, անդրադարձաւ նաեւ համապատասխան միջոցառումներ կազմակերպելով` ազգային-կրօնական աւանդոյթների ու ծէսերի պահպանման եւ տարածման ուղղութեամբ միաւորի ունեցած մեծ ներդրմանը:

Պրն. Օհանեանը վերյիշելով հիմնադիր անդամների անունները, որոնցից ներկայ էին նաեւ հանդիսութեանը, նշեց ժամանակի դժւարին եւ համեստ պայմաններով ու հնարաւորութիւններով կատարւած աշխատանքներն ու ակնարկեց միաւորի վերելքին նպաստող մեծ ներդրումին, ինչի արդունքում միաւորն այսօր շարունակում է աշխատել բարենպաստ պայմաններում: Բանախօսն իր ելոյթը եզրափակեց շնորհաւորանքներով ու բարեմաղթանքներով:

Գեղարւեստական բաժնում խմբական երգերով ելոյթ ունեցան Ս. Ամենափրկչեան Վանքի «Տաթեւ» երգչախմբի անդամուհիներ` Արեգա Յարութիւնեանը, Փարելի Թահմազեանը, Արփի Դիլանչեանը, Անի Նովշադեանը եւ մենակատար` Անասիկ Յովսէփեանը. դաշնամուրի կատարմամբ նրանց ընկերակցում էր դաշնակահար-երաժիշտ եւ «Տաթեւ» երգչախմբի ղեկավար Համիկ Ալեքսանդրեանը:

Միութեան Մշակութային միաւորի «Կռունկ» ասմունքի խմբից Ալինա Տէր-Սուքիասեանը եւ Ալինա Ալեքսանդրեանը ղեկավարութեամբ Ռիմա Սիմոնեանի ելոյթ ունեցան բանաստեղծական կտորների կատարումներով:

Յաջորդ բաժնում խանդավառ երաժշտութեան ներքոյ դահլիճ բերւեց յոբելեար միաւորի տորթը, որի հատելու պատիւը տրւեց միութեան արտօնատէրեր՝ Թաթուլ Օհանեանին եւ Այլին Մելիքեանին, միութեան Կենտրոնական վարչութեան նախագահ՝ Մասիս Մինասեանին, միաւորի վարչութեան նախագահ՝ Վարդուշ Զարգարեանին, հիմնադիր ու վաստակաշատ անդամ-ուհիներին` դկտ. Ռուդոլֆ Տէր-Գալուստին, Մագի Մելիքեանին, Զեփիւռ Մարտիրոսեանին, Աննիկ Սիմոնեանին եւ Այիդա Ղարիբեանին:

Յաջորդիւ միութեան Կենտրոնական վարչութեան ողջոյնի խօսքով հանդէս եկաւ նախագահ` Մասիս Մինասեանը, որին յաջորդեց միաւորին ուղղւած շնորհաւորական ուղերձներից հատւածների ընթերցումը:

Երեկոն շարունակւեց հիւրասիրութեամբ եւ խրախճանքով:

Հնադիսութեանը ներկայ էին Թեմական խորհրդի ներկայացուցիչները, միութեան Կենտրոնական վարչութեան անդամները, միաւորների վարչութիւնները, Երէցների միաւորի անցեալի ու ներկայի անդամ-ուհիները եւ միջոցառման իրականացման գործին աջակցութիւն ցուցաբերած անհատ-միութենականները:

Երեկոյի խրախճանքի երգ եւ երաժշտութիւնը ապահովւեց «Անի» նւագախումբը:

Ն.Ջ. Հայ Մ.Մ. «Արարատ» միութեան թղթակից

Երանուշ Թահմազեան

լուսանկարները` Գեւիկ Խաչատրեանի