Երեքշաբթի՝ մայիսի 10-ի երեկոյեան, Ն.Ջ. Հայ Մ.Մ. «Արարատ» միութեան սրահում, Նոր Ջուղայի Հայոց Առաքելական Եկեղեցեաց վարչութեան նախաձեռնութեամբ եւ Սպահանի հայոց թեմի Կրօնական խորհրդի հովանաւորութեամբ գնահատանքի երեկոյ էր կազմակերպւել, ուր մեծարւեցին Կրօնական խորհրդին ենթակայ բոլոր մարմինների անդամները եւ եկեղեցիներում ծառայող անհատները:

Ծրագրին ներկայ էին Սպահանի հայոց թեմի առաջնորդ գերշ. Տ. Բաբգէն արք. Չարեանը, ազգային մարմինների եւ Շահինշահրի հայ համայնքի վարչութեան ներկայացուցիչները, թեմի հոգեւորականաց ու դպրաց դասերը, երէցփոխները, Հոգեւոր ու Վճռաբեկ ատեանների, գիւղերի եկեղեցիների վարչութիւնների, «Շուշանիկ» երգչախմբի եւ Կանանց հոգեւոր լսարանի, եկեղեցիների բարեզարդման կանանց յանձնախմբերի, Ս. Ամենափրկչեան վանքի «Տաթեւ», Շահինշահրի «Նարեկ» եւ Ս. Ամենափրկչեան վանքի «Կոմիտաս» երգչախմբերի, Ս. Սարգիս եւ Ս. Գէորգ զօրավարների տօների առթիւ հարիսայի պատրաստման յանձնախմբի անդամները եւ մի շարք այլ հրաւիրեալներ:

Սկզբում ողջոյնի խօսքով հանդէս եկաւ երեկոյի հանդիսավար՝ Մանիա Ղուկասեանը, որից յետոյ արտայայտւեց Նոր Ջուղայի Հայոց Առաքելական Եկեղեցեաց վարչութեան ատենապետ Ղուկաս Ծատուրեանը, որը անդրադառնալով Ծառայութեան տարւան, ընդգծեց ծառայելու կարեւորագոյն դերը եկեղեցու պայծառացման, ազգի բարգաւաճման, հայրենիքի յարատեւման եւ իւրաքանչիւր հայ անհատի բարօրութեան գործում:

Այնուհետեւ երոյթ ունեցաւ Կրօնական խորհրդի ատենապետ Վարուժ Մովսիսեանը, ով ընտանիքին, համայնքին, ազգին ու հայրենիքին ծառայելը բարոյական պարտաւորութիւն համարելով, աւելացրեց, որ հայոց պատմութեան դժնդակ հանգրւաններում, հայ եկեղեցին իր ժողովրդի կողքին է եղել եւ իր ծառայութիւնն է մատուցել նրան: Նա իր խօսքի շարունակութեան մէջ նշելով, որ որպէս հայ պարտաւորութիւն ունենք մեր ունեցած բարիքների մի մասը ազգի տրամադրութեան տակ դնել եւ մեր նիւթա-բարոյական օժանդակութիւնը ցուցաբերել ազգին ու հայրենիքին, կարեւորութեամբ շեշտեց, թէ ազգի, հայրենիքի ու եկեղեցու յաւերժութեան երաշխիքը մեր սրտաբուխ ծառայութիւնն է»:

Յաջորդիւ բոլոր երգչախմբերի ներկայացուցիչները եւ մի շարք այլ հրաւիրեալներ հանդէս եկան գեղեցիկ երգերի եւ ասմունքի կատարմամբ՝ առաւել ջերմացնելով մթնոլորտը:

Ծրագրի աւարտին արտայայտւեց թեմակալ առանջորդ գերշ. Տ. Բաբգէն արք. Չարեանը: Սրբազան Հայրը Ն.Ս.Օ.Տ.Տ. Արամ Ա Վեհափառ Հայրապետի կողմից 2016 թւականը Ծառայութեան տարի հռչակւելը գեղեցիկ մտայղացում համարելով՝ աւելացրեց, որ եթէ չկարողանանք Աստծու կողմից մեզ տրւած շնորքը ծառայեցնել ուրիշներին, համայնքին, եկեղեցուն եւ ազգին, այն ժամանակ մեզ տրւածը իմաստ չի ունենայ: Նա նշելով նաեւ, որ ամենամեծ ծառան Քրիստոսն է եւ անդրադառնալով Վեհափառ Հայրապետի խօսքին ասաց, որ եթէ ամէն մարդու պարտաւորութիւնն է ծառայելը, ապա ամէն հայի պատիւը պէտք է լինի ծառայութիւնը: Սրբազան հայրը վերջում գնահատելով թեմի Կրօնական խորհրդին ու Նոր Ջուղայի Հայոց Առաքելական Եկեղեցեաց վարչութեանը երեկոյի կազմակերպման համար, այսպիսի հոծ թւով ծառայողներ ունենալը, պարզ ապացոյցը համարեց այն փաստի, որ համայնքն աշխոյժ եւ կենսունակ է ու մեր ժողովրդի զաւակները պատրաստակամ են ծառայելու իրենց ամբողջ էութեամբ:

Յատկանշելի է, որ երեկոյի ընթացքում տեղի ունեցաւ համեստ հիւրասիրութիւն, քանի որ ծրագրի համար նախատեսւած հիմնական բիւջէն, յատկացւելու է Արցախի օժանդակութեան հիմնադրամին:

«Ալիք» Օրաթերթի թղթակից (Նոր Ջուղա)