Մայրերի տօնը Նոր Ջուղայի հայոց ազգային ծերանոցի յարկի ներքոյ նշւեց ուրբաթ` ապրիլի 8-ի երեկոյեան ժամը 5-ին, մասնակցութեամբ ծերանոցի տարեց բնակիչների ու աշխատակազմի եւ Նոր Ջուղայի Հայ Կանանց Գթութեան Միութեան անդամուհիների: Ծրագրին հրաւիրւել եւ ներկայ էր Սպահանի Հայոց Թեմի առաջնորդ գերշ. Տ. Բաբգէն արք. Չարեանը, ով ծերանոց էր այցելել Թեմի Պատգամաւորական Ժողովի Դիւանի ատենապետ Վարուժ Մինասեանի եւ Կրօնական Խորհրդի անդամներ՝ ատենապետ Վարուժ Մովսիսեանի, Արմինէ Փանոսեանի եւ Սաքօ Տէր-Յովհաննիսեանի ընկերակցութեամբ:

Սկզբում Հայ Կանանց Գթութեան Միութեան անունից վարչութեան նախագահ Արմինէ Սիմոնեանը բարի-գալստեան խօսք մաղթելով գերշ. Սրբազան Հօրը եւ նրան ընկերակցող ազգայիններին, շնորհաւորեց Մայրերի տօնի կապակցութեամբ եւ հրաւիրեց ներկաներին մէկ րոպէ յոտնկայս լռութեամբ յարգել վերջին օրերի ընթացքում Ադրբեջանի վայրագութիւնների հետեւանքով զոհւած հայորդիների յիշատակը: Այնուհետեւ նա յիշեցնելով, որ 2016 թւականը Ն.Ս.Օ.Տ.Տ. Արամ Ա Վեհափառ Հայրապետի կողմից հռչակւել է որպէս «Ծառայութեան տարի», ընդգծեց, թէ հայ մօր մատուցած վեհ ծառայութիւններից է՝ հայրենասէր եւ ազգին նւիրեալ զաւակ դաստիարակելը:

Յաջորդիւ բանախօսական ելոյթով հանդէս եկաւ առաջնորդ Սրբազան Հայրը, ով սկզբում անդրադառնալով Մարիամ Աստւածածնի Աւետման տօնին, որը միաժամանակ Մայրութեան եւ գեղեցկութեան տօնն է, եւ շեշտելով, որ իւրաքանչիւր մայր, ինչպէս Ս. Կոյսը, գեղեցկանում է իր զաւակի ծնունդով, ինչի պատճառով էլ Մայրերի տօնն անւանւել է Մայրութեան ու գեղեցկութեան տօն, աւելացրեց. «Գեղեցկութիւնը կապւած է մօր տօնին, որովհետեւ մայրը չի կարող ուրիշ բան լինել, եթէ ոչ գեղեցիկ: Գեղեցկութիւնը արտաքին տեսքի մէջ չէ. գեղեցկութիւնը ներքին աշխարհի, ազնւութեան, սիրոյ հոգատարութեան եւ խնամատարութեան մէջ է»:

Գերշ. Տ. Բաբգէն արք. Չարեանն իր խօսքի մի այլ բաժնում կարեւորելով հայ կնոջ եւ մօր անժխտելի դերակատարութիւնը հայ ազգի պատմութեան ամենածանր հանգրւաններում եւ անդրադառնալով նաեւ Ծառայութեան տարւան, նշեց հայ կնոջ նւիրական աշխատանքը եւ մատուցած ծառայութիւնները թէ իր ընտանիքում եւ թէ իր ազգի ու ժողովրդի նկատմամբ՝ յատկապէս օրինակ բերելով, Հայոց Ցեղասպանութեան տարիներին հայ կանանց միջոցով իրականացւած որբախնամութեան լայնածաւալ եւ նւիրական աշխատանքը:

Վերջում թեմակալ առաջնորդը շեշտելով, որ մերօրեայ պայմաններում մայր լինելը հեշտ չէ եւ գնահատելով այսօր մեր հայրենիքը պաշտպանող զաւակների մայրերին՝ նման սերունդ դաստիարակելու համար, աղօթեց Բարձեալին՝ երկնային խաղաղութեան մէջ հանգչեցնի մեր նահատակներին, իսկ հայ ազգն ու հայրենիքը պաշտպանող հերոսներին պարգեւի ուժ եւ անպարտելիութիւն ապա ծաղկեպսակով գնահատեց Հայ Կանանց Գթութեան միութեան անդամուհի Ժանետ Այւազեանին՝ այնպիսի որդի դաստիաակելու համար, ով այսօր որպէս զինւոր իր ծառայութիւնն է մատուցում հայրենիքին՝ Լեռնային Ղարաբաղի սահմանները պաշտպանելու գործին մասնակից լինելով:  

Բանախօսական ելոյթից յետոյ Արմինէ Սիմոնեանը յայտարարեց, որ Կանանց Գթութեան միութիւնը որոշակի գումար աւելացնելով իր 100-ամեակի յոբելեանական ձեռնարկի ընթացքում արցախահայութեան օգտին կատարւած նւիրատւութիւններին, այն արդէն փոխանցել է Արցախ՝ Լեռնային Ղարաբաղի իշխանութեանն ու ժողովրդին զօրակցելու համար: Այնուհետեւ ծրագիրը շարունակւեց առաւել ջերմ ու մտերմիկ մթնոլորտի ներքոյ՝ ներկաների անհատական երգերի ու ասմունքների կատարմամբ, օրւան պատշաճ բարեմաղթանքներով եւ ընդունելութեամբ:

Միջոցառման աւարտին գերշ. Սրբազան Հայրը Մայրութեան տօնի առթիւ ծաղիկներ նւիրեց Կանանց Գթութեան միութեան անդամուհիներին ու ծերանոցի աշխատակազմին, իսկ տարեց բնակիչներին՝ ծաղիկներ եւ Քրիստսի սրբապատկերով յուշանւէրներ: Թեմակալ առաջնորդն այցելեց նաեւ առողջական խնդիրների պատճառով ծրագրից բացակայող բնակիչներին՝ իրենց սենեակներում եւ աղօթեց նրանց շուտափոյթ առողջացման համար:

«Ալիք» օրաթերթի թղթակից (Նոր Ջուղա)