Ն.Ջ. Հայ Մ.Մ. «Արարատ» միութեան Շահինշահրի մասնաճիւղի վարչութեան նախաձեռնութեամբ, թւականիս Մարտի 2-ի ժամը 19:00-ին, կազմակերպւել էր գնահատանքի երեկոյ ի պատիւ միութեան Երէցական միաւորի անդամների։ Հաճելի երաժշտութեան հնչիւնների ներքոյ «Ս. Վարդանանց» դպրոցի փոքր սրահում հիւրընկալւեցին միաւորի անդամները։

Երեկոյին ներկայ էին Շահինշահրի հոգեւոր տեսուչ՝ հոգշ. Տ. Անանիա վրդ. Գուճանեանը եւ արժն. Տ. Սահակ քհնյ. Մինասեանը։ Միութեան գրասենեակի պատասխանատու Մարիա Խուդավերդեանը ողջունեց բոլորին եւ ներկայացրեց միջոցառման նպատակը։ Ապա խօսքը փոխանցեց մասնաճիւղի վարչութեան նախագահ՝ Գեւիկ Խաչատրեանին, ով ողջունեց ներկաներին եւ շնորհակալութիւն յայտնեց հրաւէրը ընդունելու համար, ապա նշեց, որ միութեան ոչ մի աշխատանք չի կարելի պատկերացնել առանց Երէցական միաւորի անմիջական օգնութեան։ Նա գովեստի խօսքեր ուղղեց միաւորի անդամուհիների հասցէին՝ նրանց կատարած անշահախնդիր եւ անխոնջ աշխատանքի համար, մաղթելով առողջութիւն եւ յաջողութիւններ անձնական կեանքում։

Մաղթանքի խօսքով հանդէս եկաւ հոգշ. Տ. Անանիա վրդ . Գուճանեանը։ Հոգշ. Հայր Սուրբը գնահատեց «Արարատ» միութեան վարչութեանը, որ կազմակերպել էր այս երեկոն, որպէսզի շնորհակալութիւն յայտնի բոլոր նրանց, ովքեր սիրով եւ ազգային գիտակցութեամբ իրենց լուման են ներդրել «Արարատ» միութեան պատմութեան էջերում։ Հոգշ. Հայր սուրբը մեծ պատիւ համարեց գնահատել պատրաստւած, կամաւոր եւ գիտակցւած, Երէցական միաւորի շարքերում աշխատող կանանց, որոնց մէջ չկայ տարիքային սահմանափակում եւ զուգահեռներ անցկացնելով «Մշակների առակ»-ի միջեւ, նշեց, որ իւրաքանչիւրն արժանի է իր վարձին: Շարունակելով իր միտքը՝ հոգշ. Հայր Սուրբը նշեց. «Երէցական միաւորին պէտք է գնահատեմ, այն իմաստով, որ իր գործունէութեամբ իսկապէս կարեւոր եւ անկիւնադարձային միաւոր է։ Երբ ասւում է՝ երէց, այնտեղ տեսնում ենք փորձառութիւն, տեսնում ենք աշխատանք, նւիրում եւ մասնաւորաբար՝ նպատակ։ Նպատակն է, որ խթան է հանդիսանում միութեան բարգաւաճմանը»: Հոգշ. Տ. Անանիա վրդ. Գուճանեանը մեծագոյն չարիք համարեց համայնքի ժողովրդի եւ երիտասարդ-ուհիների անտարբերութիւնը: Յորդորեց աշխատել պատրաստակամութեամբ, սիրով ու նւիրումով:

Հոգշ. Հայր Սուրբը վերջում գնահատեց «Արարատ» միութեան Շահինշահրի մասնաճիւղի վարչութեան անդամներին, ովքեր միաձայն, միախոհ, համախմբւած ջանք չեն խնայում միութեան վերալիցքաւորման, վերակազմաւորման համար, ցանկանալով յաջողութիւն եւ նորանոր վերելքներ, նոր մտքեր ու ծրագրեր։

Շնորհակալական խօսքով հանդէս եկաւ Երէցական միաւորի նախագահ՝ Լինա Մովսիսեանը։

Կատարւեց Երէցական միաւորի անդամուհիների գնահատագրերի յանձնումը։ Պահը պատեհ համարելով, գնահատագիր յանձնւեց նաեւ «Նարեկ» մանկապարտէզ-նախակրթարանի ուսուցչուհի Էմմա Օրդուբեգեանին՝ 2015 թւականի ամառային արձակուրդի օրերին «Մանկական ժամանց» ծրագիրը սիրայօժար կազմակերպելու համար։

Գնահատանքի խօսքերով արտայայտւեց նաեւ արժն. Տ. Սահակ քհնյ. Մինասեանը։ Նա նշեց, որ միասնականութինը, համախմբւածութիւնը եւ նւիրւածութիւնը հանդիսանում են միաւորների ծաղկման եւ միութեան աշխատանքների բարգաւաճման գրաւականը։

Նկատի ունենալով այն հանգամանքը, որ երեկոն համընկնում էր Մեծ Պահքի Միջինքի հետ, ուստի վարչութիւնը պատրաստել էր բախտախաղի քաղցրաւենիք։ Միջոցառումը հաճելի եւ անմոռանալի դարձնելու համար Գեւիկ Խաչատրեանը անցկացրեց հետաքրքիր խաղ-մրցութիւններ. նա իր անմիջական եւ ջերմ վերաբերմունքով բոլոր ներկաներին մասնակից դարձրեց մրցութիւններին: Յաղթողներին սպասւոմ էր անակնկալ նւէրներ:

Վարչութիւնը պատրաստել էր նաեւ հիւրասիրութիւն։ Խնջոյքի ընթացքում տիրում էր ուրախ ու հարազատ մթնոլորտ։ Ներկաներից Վարուժ Թահմազեանը ընթերցեց իր հեղինակային կատակ-բանաստեղծութիւնը, իսկ Էլիզ Շահիջանեանը, Քարմէն Շահիջանեանը եւ Բիւրա Մինասեանը հանդէս եկան երգերի գեղեցիկ կատարումներով՝ հաճելի պահեր պարգեւելով ներկաներին։

Ուրախ երեկոն ու բարձր տրամադրութիւնը տեւեց մինչեւ ժամը՝ 23:00:

Ն.Ջ. Հայ Մ.Մ. «Արարատ» Միութեան

Շահինշահրի մասնաճիւղի թղթակից

Աիդա Մուրադեան