Չորեքշաբթի՝ փետրւարի 24-ի երեկոյեան, Իրանի Իսլ. Խորհրդարանի 10-րդ շրջանի Սպահանի եւ հարաւային իրանահայութեան պատգամաւորութեան թեկնածու Ժորժիկ Աբրահամեանը, քարոզարշաւի վերջին ժամերն անցկացրեց Նոր Ջուղայի համայնքի հետ հանդիպմամբ՝ Ն. Ջ. Հայ Մ. Մ. «Արարատ» միութեան սրահում:

Հանդիպումն սկիզբ առաւ թեկնածուի Կենտրոնական շտաբի ներկայացուցիչ Վրէժ Շիրւանեանի ողջոյնի խօսքով, որից յետոյ խօսքը տրւեց Իսլ. Խորհրդարանում Սպահանի եւ հարաւային իրանահայութեան պատգամաւոր Ռոբերտ Բեգլարեանին, ով շնորհակալութիւն յայտնեց ժողովրդին՝ խորհրդարանի անցնող երեք շրջանի ընտրութիւններում իրեն քւէարկելու եւ պատգամաւորութեան պատասխանատու գործն իրեն վստահելու կապակցութեամբ: Ապա նա նշելով, որ  խորապէս համոզւած է, թէ քաղաքականութեան ասպարէզում անհրաժեշտ է պարբերաբար ներգրաւել նոր ուժով, նոր հայեացքով եւ նոր փորձառութեամբ անհատների, իր ուրախութիւնը յայտնեց Ժորժիկ Աբրահամեանի թեկնածութեան առաջադրման առթիւ եւ կոչ արեց բոլորին՝ ինչպէս միշտ, խուռներամ շարքերով մասնակցել ընտրութիւններին:

Երեկոյի շարունակութեան մէջ Վրէժ Շիրւանեանը ներկայացնելով թեկնածուի կենսագրական գծերը, ծաւալած գործունէութիւնն ու ապագայ ծրագիրը, նրան բեմ հրաւիրեց արտայայտւելու:

Ժորժիկ Աբրահամեանը ողջունելով ներկաներին՝ շնորհակալական խօսք ուղղեց Ռոբերտ Բեգլարեանին՝ անցնող 12 տարիների ընթացքում կատարած արդիւնաւէտ աշխատանքի համար: Այնուհետեւ կարեւորութեամբ անդրադառնալով համայնքի կենսունակութեան պահպանմանը եւ արտագաղթի ալիքը կոտրելու անհրաժեշտութեանը, հաւաքականութեան համար խիստ վտանգաւոր համարեց անձնական շահերով առաջնորդւելը եւ շեշտեց, որ յաջողութիւնների հասնելու համար պէտք է լինել միահամուռ, աշխատել փոխադարձ յարգանքով ու սիրով եւ ապրել միմեանց շահերը նոյնպէս նկատի առնելով:

Նա իր ելոյթը ծաւալեց նաեւ տարբեր ուղղութիւններով, ուր խոստացաւ յատկապէս անխափան կապ պահել ժողովրդի հետ, սատար հանդիսանալ ցանկացած ձեռներեցին եւ աշխատողին՝ իր աշխատանքն առաւել արդիւնաւէտ դարձնելու համար, պաշտպանել համայնքային իրաւունքներն ու շահերը եւ ստեղծւած նոր կարելիութիւնների հիմամբ աշխատել Իրան-Հայաստան յարաբերութիւնների ընդարձակման ուղղութեամբ:

Հանդիպման վերջին բաժնում ներկաներն արտայայտեցին իրենց տեսակէտները եւ թեկնածուից ստացան իրենց հարցերի պատասխանները:

«Ալիք» օրաթարթի թղթակից (Նոր Ջուղա)