Ուրբաթ՝ 2016 թւականի յունւարի 1-ի երեկոյեան, Շահինշահրի Հայոց Ազգային «Սրբոց Վարդանանց» դպրոցի սրահում, տարեմուտի առթիւ մատուցւեց սուրբ եւ անմահ Պատարագ՝ համայնքի հոգեւոր տեսուչ հոգշ. Տ. Անանիա վրդ. Գուճանեանի ձեռամբ եւ արժն. Տ. Սահակ քհնյ. Մինասեանի ու դպրաց դասի մասնակցութեամբ:
Ս. Պատարագի քարոզի պահին իր բովանդակալից խօսքը փոխանցեց հոգշ. Հայր Սուրբը՝ բնաբան ունենալով 2-րդ Սաղմոսից. «Տէ՜ր, եթէ իմ շուրթերը բացես, ես պիտի փառաբանեմ Քեզ» համարը: Նա իր խօսքում ասաց. «Սիրելի՛ հաւատացեալներ, ահաւասիկ Նոր Տարւայ առաջին օրւայ բնաբանը, ահաւասիկ Նոր Տարւայ այն առաջին խօսքերը, որ մեզանից իւրաքանչիւրը որպէս շնորհակալութիւն Աստծուն պէտք է արտայայտի։ Ահաւասիկ 2016 թւականի առաջին օրն էլ հասնում է իր աւարտին: Մէկ տարի բոլորեցինք Աստծու եւ Տիրոջ առաջնորդութեամբ, փակելով 2015 թւականի օրացոյցը, եւ թեւակոխում ենք 2016 թւական՝ նոր յոյսերով, նոր երազներով, նոր մտքերով եւ մանաւանդ նոր ապագայի տեսլականով: Բնական է մարդու կեանքի ընթացքը ոչ մի ձեւով չի փոխւելու այն մէկ թւանշանի հետ, ինչպէս օրացոյցի մէջ է փոխւում, այլ՝ կեանքը շարունակւում է, կեանքը առաջ է գնում իր բնականոն ընթացքով. մարդ ինքն է, որ պէտք է փոխւի. մարդ ինքն է, որ իր կեանքի, սրտի եւ մտքի թւականն է փոխում...
Սէրը, յարգանքը, հեզութիւնը, համեստութիւնը, բարութիւնը, համբերատարութիւնը, միմեանց օգնութեան ձեռք մեկնելը, Աստծուն փառաբանելը այն ուղիներն են, որոնք կարող են մեր կեանքը իմաստաւորել: Մեր կեանքի իւրաքանչիւր օրն Աստծու կողմից մեզ մեծագոյն նւէրն է. պէտք է շնորհակալ լինենք Աստծուն եւ կատարենք Նրա պատւիրանները:
Նոր Տարին առիթ է տալիս մեզ՝ ինքնաճանաչման, գիտակցելու եւ որպէս նոր մարդ մեր կեանքերը դասաւորելու»։
Իր խօսքի աւարտին հոգշ. Հայր Սուրբն իր, Համայնքի Վարչութեան եւ արժն. Տ. Սահակ քհնյ. Մինասեանի անունից Նոր Տարին շնորհաւորեց համայնքի բոլոր զաւակներին՝ մաղթելով նրանց սէր, երջանկութիւն, առողջութիւն, փափագների իրականացում եւ որ ամենից կարեւորը միասնական ու միակամ աշխատանք: Հոգշ. Հայր Սուրբը նաեւ Սպահանի Հայոց Թեմի բարեջան առաջնորդ գերշ. Տ. Բաբգէն Արք. Չարեանի շնորհաւորման խօսքը փոխանցեց ներկաներին:
Եկեղեցում ներկայ գտնւող հաւատացեալները Ս. Հաղորդութիւն ստացան եւ տարւայ առաջին օրը Բարձրեալին գոհութիւն մատուցելով՝ հայցեցին Նրա օրհնութիւնը:
Երեքշաբթի՝ յունւարի 5-ին, կէսօրից յետոյ ժամերգութիւն եւ Ճրագալոյցի Ս. Պատարագ մատուցւեց հոգշ. Տ. Արտակ վրդ. Արաբեանի ձեռամբ: Յընթացս արարողութեան, պատարագիչ Հայր Սուրբն ընթերցեց Մեծի Տանն Կիլիկիոյ Ն.Ս.Օ.Տ.Տ. Արամ Ա Կաթողիկոսի հայրապետական պատգամը Ս. Ծննդեան տօնի առթիւ։ Յաւարտ Ս. Պատարագի տեղի ունեցաւ նախատօնակ եւ աւետում Յիսուս Քրիստոսի Ս. Ծննդեան:
Այնուհետեւ երեքշաբթի՝ յունւարի 6-ի առաւօտեան մատուցւեց Ս. Պատարագ՝ մեր Տիրոջ՝ Յիսուս Քրիստոսի Ս. Ծննդեան եւ Աստւածայայտնութեան տօների առիթով՝ հոգշ. Տ. Անանիա վրդ. Գուճանեանի ձեռամբ: Իսկ յաւարտ Ս. Պատարագի կատարւեց Ջրօրհնէքի արարողութիւն, որից յետոյ Հայր Սուրբը դպրոցի սրահում ընդունեց շնորհաւորանքներ:
