Աղբիւր՝ www.alikonline.ir

Սիրելի հայրենակիցներ, ջերմօրէն շնորհաւորում եմ Ամանորը եւ Յիսուս Քրիստոսի Ս. Ծնունդն ու Մկրտութիւնը: Յուսամ, որ առաջիկայ տարին համայն հայութեան, ի մասնաւորի իրանահայութեան համար լինի բարիքներով, նւաճումներով եւ յաջողութիւններով լի տարի: Այս օրերին դժբախտաբար տարածաշրջանը խիստ վայրիվերումների մէջ է եւ ականատեսն ենք, որ չարանենգ եւ փոքրոգի անձինք ու կազմակերպութիւններ, ինչպիսի արհաւիրքներ են ստեղծում:

Այս խառնիճաղանճ պայմաններում անհրաժեշտ է, որ ելնելով մեր քրիստոնէական հաւատքից, զօրանանք եւ նեցուկ հանդիսանանք մեր մուսուլման եղբայրներին, ապացուցելու համար, որ միաստւածային կրօնների հետեւորդները ի զօրու են համագործակցութեամբ, փոխադարձ յարգանքով ու սէրով օժտւած մի նոր աշխարհ կերտել: Դա ինքնին կարօտ է այն հանգամանքի, որ մենք վերստին վերագնահատենք մեր համամարդկային արժէքները, մեր կրօնից բխած սկզբունքները ու այդ ուղղութեամբ ընթանանք եւ այսպիսով առիթ ընձեռնենք համագործակցութեան, փոխադարձ ընկալումների ու փոխհասկացութիւնների, քանզի այդ քայլերից է բխում համագործակցութիւնը, խաղաղութիւնը, բարգաւաճումը եւ զարգացումը:

Մաղթում եմ, որ առաջիկայ տարին լինի խաղաղութեան, յաջողութեան եւ առողջութեամբ մէկտեղւած տարի՝ բոլորի համար: