Նոր Ջուղայի Հայ Մարզա-մշակութային «Արարատ» Միութեան հիմնադրման եւ գործունէութեան 60-ամեակի յոբելենական ձեռնարկները ամփոփւեց հինգշաբթի՝ դեկտեմբերի 17-ին, գեղարւեստական յայտագրով:

Երեկոյի բացումը կատարւեց «Ձօն «Արարատ» միութեան 60 ամեակին» երգով, ապա ի յարգանք միութեան ննջեցեալ հիմնադիրների ու միութենականների յիշատակին հնչեց Ե. Չարենցի «Յիշատակը Ձեր անցած օրերի արձագանքն է» բանաստեղծութեան յուզիչ կատարումը, որին յաջորդեց Ն. Ջ. Հայ Մ. Մ. «Արարատ» միութեան Կենտրոնական վարչութեան նախագահ՝ Մասիս Մինասեանի ողջոյնի խօսքը:

Յաջորդիւ Սպահանի Հայոց Թեմի առաջնորդ գերշ. Տ. Բաբգէն արք. Չարեանն ընթերցեց Կիլիկիոյ Կաթողիկոս Ն.Ս.Օ.Տ.Տ. Արամ Ա Վեհափառ Հայրապետի սրբատառ կոնդակը՝ միութեան 60-ամեակի առթիւ։ Նոյն առիթով Թեմի առաջնորդ գերշ. Տ. Բաբգէն արք. Չարեանի օրհնութեան եւ գնահատանքի գիրը ընթերցեց Շահինշահրի հոգեւոր տեսուչ՝ հոգշ. Տ. Անանիա վրդ. Գուճանեանը:

Շնորհաւորական ուղերձ էին յղել նաեւ Թեհրանի եւ Ատրպատականի հայոց թեմերի հոգեւոր առաջնորդները, Շահինշահրի հոգեւոր տեսուչը, Իսլ. խորհրդանարում զոյգ պատգամաւորները, Հայ Դատի շրջանիս յանձնախումբը, «Ալիք» օրաթերթի տնօրինութիւնը եւ խմբագրական կազմը, Միութեանս արտօնատէր Թաթուլ Օհանեանը, Թեհրանի, Նոր Ջուղայի, եւ Շահինշահրի ազգային մարմինները եւ ենթամարմինները, կազմակերպութիւնները, միութիւնները եւ Նոր Ջուղայի Հայոց ազգային դպրոցները, որոնցից ընթերցւեցին հատւածներ:

Գեղարւեստական բաժնում հնչեցին երաժշտական հեղինակային կենդանի կատարումներ, երգեր, իւրովի մօտեցումներով ներկայացումներ եւ ազգային պարեր՝ միութեան Մշակութային միաւորի խմբերի եւ անցեալի միութենականների միջոցով:

Երեկոյի աւարտին խօսքը տրւեց Թեհրանի Հայոց Թեմի առաջնորդ գերշ. Տ. Սեպուհ արք. Սարգսեանին: Սրբազան Հայրն իր անհուն ուրախութիւնը յայտնեց կազմակերպւած հանդիսութեանը ներկայ լինելու կապակցութեամբ եւ ասաց. «Մեր ժողովրդի գոյապայքարի եւ պահանջատիրական երթի ընթացքը միշտ իրագործւում է նայելով դէպի վեր, դէպի հայ ժողովրդի յաւերժութեան խորհրդանիշ՝ Արարատին եւ պատահական չէ, որ «Արարատ» անունով են կնքւած մեր միութիւնները»: Շարունակութեան մէջ նա նշեց. «Որեւէ միութիւն արժեւորւում է ազգին, հայրենիքին եւ եկեղեցուն ներդրած ծառայութեամբ, յատկապէս այս օրերում, երբ աշխարհում ականատես ենք ամէն վայրկեան վճռորոշ դէպքերի ու ճակատագրական պատահարների, պիտի պատրաստ լինենք արարատանման հաւատքով ու կեցւածքով դիմագրաւելու առկայ մարտահրաւէրներին ու խոչընդոտներին. այս է պահանջում այսօրւայ յոբելենական հանդիսութիւնը.... Թող Աստւած անսասան պահի Արարատի ընտանիքը, մեր ժողովուրդն ու հայրենիքը, որպէսզի դրանով զօրացած կարողանանք նաեւ մեր ներդրումը բերել համայն աշխարհին եւ խաղաղութեան հաստատմանը»:

Երեկոյի եզրափակիչ խօսքում Թեմակալ առաջնորդ Սրբազան հայրն եւս իր ուրախութիւնը յայտնեց հրաշալի եւ անզուգական երեկոյի կապակցութեամբ եւ ասաց. «Ամեակները սովորական պահեր չեն, առիթներ են, որ մենք անդրադառնանք եղածի անցեալին ու ներկային, որպէսզի կարողանանք նայել վաղւան: Արարատը եւ մեր բոլոր կառոյցները պարտականութիւններ ունեն մեր ժողովրդի հանդէպ. բաւ չէ միայն անցեալով հպարտանալ, պիտի քայլել առաջ, քայլել անվարան եւ յաղթական տօնախմբութիւն կատարել՝ այնպէս, ինչպէս վայել է մեր ժողովրդին»: Շարունակութեան մէջ ասաց. «Արարատը դպրոց է, այն 60 երկար տարիներ դաստիարակել է սերունդներ, որպէսզի պահապանը լինեն մեր սրբութիւնների ու արդար իրաւունքների»: Գերշ. Սրբազան Հայրը նաեւ յոբելենական ձեռնարկի կապակցութեամբ գնահատանքի խօսք ուղղեց Կենտրոնական վարչութեանը, Յոբելենական յանձնախմբին, գեղարւեստական բաժնի պատասխանատուներին ու մասնակիցներին եւ բարի երթ ու նորանոր յաջողութիւններ մաղթեց նրանց:

Յատկանշելի է, որ երեկոն առաջնորդւում էր միութեան պատմականը ներկայացնող գեղարւեստական տեկստով:

Երեկոյի աւարտին ներկաները այցելեցին դահլիճին կից սրահում կազմակերպւած միութեան անցեալն ու ներկան ներկայացնող լուսանկարների, հրատարակութիւնների, որմազդների, մեդալների, գաւաթների ու յուշանւէրների ցուցահանդէսը:

Այնուհետեւ ի պատիւ պաշտօնական հրաւիրեալների տեղի ունեցաւ ընդունելութիւն եւ յուշամեդալների յանձնում:

Երեկոյին ներկայ էին՝ Հայաստանից, Լիբանանից, Թեհրանից եւ Նոր Ջուղայից ու Շահինշահրից պաշտօնական հրաւիրեալներ, անցեալի ու ներկայի միութենականներ եւ հոծ թւով հանդիսատես:

Գեղարւեստական յայտագիրը ներկայացւեց հետեւեալ կարգով.

- «Ձօն «Արարատ» միութեան 60-ամեակին» երգի կատարում՝ Արթին Քեշիշեան, ձայնակցութեամբ Զարեհնուշ Աղուրեանի եւ Անասիկ Յովսէփեանի: Երաժշտութիւն՝ դոկտ.Արբի Բաբումեան

- «Կառուզօ»՝ սաքսոֆոնահար՝ Ասպետ Սիմոնեան

- Ե. Չարենցի «Յիշատակը Ձեր անցած օրերի արձագանքն է» ասմունքի կատարում՝ Ռիմա Սիմոնեան-Օհանեան

- Ուղերձների ընթերցում՝ Լեռնիկ Ծատուրեան, Մանիա Ղուկասեան եւ Արթին Մուրադեան

- «Իմ եղէգ» եւ «Աշուն» երգերի կատարում՝ Նոր Ջուղայի երգչուհի (այժմ թեհրանաբնակ) Օֆիկ Մելիքեան, ընկերակցութեամբ երաժիշտ-դաշնակահար Համիկ Ալէքսանդրեանի

- «Մանկական եռանդ» եւ «կեանքի անցում» դաշնամուրային կատարում՝ Համիկ Ալէքսանդրեան

- «Կռունկ» ասմունքի խմբի ողջոյնի ելոյթ՝ «Միութիւնը տունն է մեր» խօսքի բեմականացում մասնակցութեամբ Կարին Տէր-Մարտիրոսեանի, Լեռնիկ Ծատուրեանի, Մանիա Ղուկասեանի եւ Ալինա Տէր-Սուքիասեանի, չեքստի հեղինակ՝ իրանահայ անւանի բանաստեղծ Վարանդ եւ «Կռունկ» ասմունքի խմբի ղեկավար Ռիմա Սիմոնեան-Օհանեան

- «Հանինօ», «Շատախի» եւ «Տօնական» պարային համարներ «Կռունկ» պարախմբի կատարմամբ

- «Լեւոն Շանթ» թատերախմբի օղջոյնի ելոյթ, Յ. Թումանեանի «Մի կաթիլ մեղր» հեքիաթի բեմականացում ՝ մենակատար Վիգէն Մովսիսեան

- «Սիրոյ երեկոյ» եւ «Լապտերիկ» երգերի կատարում՝ Կարէն Օհանեան, ընկերակցութեամբ՝ Քրիստինէ Յակոբեանի եւ Սեւադա Խաչիկեանի զուգապարով

- Հանդիսավար՝ Կարին Տէր-Մարտիրոսեան

- Պարուսոյց՝ Յակոբ Մարգարեան

- Գեղարւեստական ղեկավարներ՝ Ռիմա Սիմոնեան-Օհանեան եւ Կարին Տէր- Մարտիրոսեան

- Պարախումբ՝ Նարէ Ասատրեան, Անի Ասատրեան, Նազէ Ասատրեան, Աւենիա Բաղրամեան, Վանէ Իսաղուլեան, Սարինէ Խուդաբախշեան, Սելինէ Խուդաբախշեան, Նարէ Մարկոսեան, Վանէ Մինասեան, Քրիստինէ Յակոբեան, Սիւնէ Շահիջանեան եւ Ալինա Տէր-Սուքիասեան

- Բեմայարդարներ՝ Նայիրի Այւազեան եւ Ռազմիկ Նազարեան

- Թեմատիկ պատկերների պատրաստում եւ էկրանաւորում՝ Վերգինէ Միրզախանեան եւ Նարինէ Տէր-Գրիգորեան

- Որմազդ եւ յայտագիր՝ Նայիրի Այւազեան

- Հնչունային պատասխանատու՝ Ասպետ Սիմոնեան եւ Սեւադա Խաչիկեան

- Յոբելենական յանձնախումբ՝ Վարդուշ Զարգարեան, Արսինէ Մանսուրեան, Մանիա Ղուկասեան, Հրաչ Տէր-Յովհաննիսեան, Դիմիթրի Յովհաննիսեան, Գեւիկ Խաչատրեան, Անդրէ Քալանթար-Օհանեան եւ Արթին Վարդանեան