Ն.Ջ. Հայ Մ.Մ. «Արարատ» միութեան հիմնադրման 60-ամեակի յոբելենական ձեռնարկների շարանում, ուրբաթ՝ նոյեմբերի 20-ի առաւօտեան ժամը 10-ին, Նոր Ջուղայի Հայոց ազգ. գերեզմանատանը տեղի ունեցաւ Հոգեհանգստեան արարողութիւն՝ ի յիշատակ միութեան ննջեցեալ հիմնադիրների եւ միութենականների, ովքեր նշանակալի դեր են ունեցել միութեան կեանքի վերելքի ուղղութեամբ: Գլխաւորութեամբ Սպահանի Հայոց թեմի առաջնորդ՝ Տ. Բաբգէն արք. Չարեանի եւ մասնակցութեամբ Շահինշահրի հոգեւոր տեսուչ Տ. Անանիա վրդ. Գուճանեանի, հոգեւորականաց եւ դպրաց դասերի ու միութեան Սկաուտական միաւորի Արի-արենուշական հատւածից կազմւած դրօշակակիր խմբի, Հոգեհանգստեան արարողութիւնը կատարւեց միութեան վաստակաւոր վարչական անդամ Յակոբ Յարութիւնեանի յուշաքարի առջեւ եւ ննջեցեալ միութենականների պատկերների ներքոյ: Ապա Միութեան 60-ամեակի յոբելենական յանձնախմբի խօսքն ընթերցեց Մանիա Ղուկասեանը, որից յետոյ ներկաները խունկ ծխեցին ննջեցեալների հոգիների խաղաղութեան համար: Արարողութեանը ներկայ էին ազգային մարմինների ներկայացուցիչները, Հայ դատի յանձնախմբի ներկայացուցիչը, Միութեան եւ Շահինշահրի մասնաճիւղի վարչական անդամները, Յոբելենական յանձնախմբի անձնակազմը, միութեան Սկաուտական միաւորի Արի-արենուշական հատւածների եւ Երէց փաղանգի զգեստաւորւած անդամները, ննջեցեալ միութենականների ընտանիքի անդամները եւ միութենականներ:
Հոգեհանգստեան արարողութիւնից յետոյ՝ միութեան սրահում տեղի ունեցաւ ընդունելութիւն, որտեղ թեմակալ առաջնորդ Սրբազան Հայրը հայրական իր խօսքում նախ գնահատանքի խօսք ուղղեց Միութեան Կենտրոնական վարչութեանը եւ 60-ամեակի Յոբելենական յանձնախմբին՝ հոգեհանգստեան արարողութիւնը կազմակերպելու համար եւ իր ուրախութիւնը յայտնեց, որ մեծ թւով միութենականներ մասնակից եղան արարողութեանը եւ յայտնեց, այսօր երբ «Արարատ» միութիւնը տօնում է իր 60-ամեակը եւ ներկայանում է իր հարուստ անցեալով, նոյն խանդավառութեամբ եւ վարչական անդամների ու միութենականների նոյն անսակարկ նւիրումով շարունակում է իր երթը: Թեմակալ առաջնորդը նաեւ կարեւորեց միութեան դերը մարզա-մշակութային ոլորտում առողջ սերունդ դաստիարակելու առումով: Վերջում Աստծուց հայցեց, որ ննջեցեալ միութենակաների հոգիներին խաղաղութիւն պարգեւի ու նրանց երկնային լուսեղէն պսակին արժանացնի, իսկ ներկայում աշխատող միութենականներին օրհնեց եւ ուժ ու կորով մաղթեց նրանց, որպէսզի շարունակեն այս նւիրական առաքելութիւնը՝ ի խնդիր թեմի զաւակների առողջ դաստիարակութեան: Սրբազան հայրն իր ելոյթը եզրափակեց աղօթքով:
Նշելի է, որ ծրագիրը վայելում էր թեմակալ առաջնորդ Սրբազան հօր հովանաւորութիւնը:
