Երեքշաբթի՝ նոյեմբերի 10-ի յետմիջօրէի ժամը 2:30-ին, Ս. Ամենափրկչեան վանք այցելեց ռուսական պատւիրակութիւն, որին առաջնորդում էին Ռուսաստանի Դաշնութեան Աշխատանքի նախարար Մաքսիմ Տոպիլինը եւ Իրանի Իսլամական Հանրապետութիւնում Ռուսաստանի Դաշնութեան արտակարգ եւ լիազօր դեսպան հայազգի Լեւոն Ջաղարեանը: Ս. Ա. Վանքում պատւիրակութեան անդամները հիւրընկալւեցին Ծաղկեայ դահլիճում, որտեղ հանդիպում ունեցան Սպահանի հայոց թեմի բարեջան առաջնորդ գերշ. Տ. Բաբգէն արք. Չարեանի հետ:
Հանդիպման ընթացքում առաջնորդ Սրբազան Հայրն ուրախութեամբ ողջունեց հիւրերի ներկայութիւնը, բարձր գնահատեց Ռուսաստանի Դաշնութեան գործունէութիւնը՝ տարածաշրջանի կարգավիճակի կայունացման եւ խաղաղութեան հաստատման ուղղութեամբ եւ շնորհակալութիւն յայտնեց հայ ժողովրդի ու Հայաստանի նկատմամբ, ինչպէս նաեւ Հայոց ցեղասպանութեան ճանաչման գծով Ռուսաստանի բարեացակամ եւ դրական մօտեցման համար, միաժամանակ իր, Թեմի ազգային իշխանութեան եւ հայ համայնքի անունից ցաւակցութիւն յայտնեց Ռուսաստանում վերջերս տեղի ունեցած աւիավթարի հետեւանքով մարդկային ծանր կորուստների համար:
Պրն. նախարարը շնորհակալութիւն յայտնելով ջերմ ընդունելութեան համար, շեշտեց, որ Ռուսաստանի Դաշնութեան արտաքին քաղաքականութիւնն է նեցուկ հանդիսանալ հարեւան երկրներում եւ տարածաշրջանում խաղաղութեան հաստատման եւ անդորրութեան պահպանման գործին: Անդրադառնալով Հայաստան-Ռուսաստան բարիդրացիական կապերին, նախարարը նշեց, որ երկու երկրների փոխգործակցութիւնը ամուր հիմքեր ունեն, ինչի փաստը վերջերս Հայաստանի անդամակցութիւնն է Եւրասիական Տնտեսական Միութեանը: Յարգելի նախարարը իր արտայայտութիւնների շարունակութեան մէջ, ընդգծելով Իրանում կրօնական եւ ազգային փոքրամասնութիւնների իրաւունքների պաշտպանւածութիւնը, իր ուրախութիւնը յայտնեց այդ կապակցութեամբ:
Հանդիպումն աւարտւեց բարեմաղթանքներով եւ նոր այցելութիւնների ակնկալիքով:
