Սիրելի հայրենակիցներ,

2015 թւականին լրանում է Նոր Ջուղայի Հայ Մարզա-մշակութային «Արարատ» Միութեան հիմնադրութեան 60-ամեակը:

Հիմնադիր սերնդի գաղափարական ակունքներին հաւատարիմ Նոր Ջուղայի «Արարատ» Միութիւնը, իրանահայ մարզա-մշակութային կեանքում իր ուրոյն դերակատարութեամբ, նւաճած յաջողութիւններով եւ ձեռքբերումներով 6 տասնամեակ շարունակ նպաստել է իրանահայ երիտասարդութեան ազգային առողջ դաստիարակութեան, մարզական ոգու ամրապնդման, մշակութային կեանքի աշխուժացման եւ վերելքին:

60 տարի անդուլ պայքարը մղել է պատանիներին եւ երիտասարդներին համահայկական իդեալների շուրջ համախմբւելու եւ պահանջատիրական ոգով դաստիարակւելու: 60 տարի անընդմէջ աշխատանքը իրանահայ մարզիկների եւ մշակութային գործիչների պատւաբեր ներկայութիւնը ապահովելու է Իրանի ազգային հաւաքականներում եւ մշակութային խմբերում:

Յետդարձ հայեացք նետելով Միութեանս 60-ամեայ գործունէութեան վրայ, մեր հանրութեան առջեւ հպարտութեան եւ պատասխանատւութեան զգացումով ենք հանդէս գալիս: Հպարտութեան զգացում՝ 60 երկար տարիների ընթացքում անկոտրում կամքով, վճռականութեամբ եւ անսակարկ նւիրումով աշխատելու եւ Միութեանս հիմնադիրների որդեգրած նպատակներից չշեղւելու պատճառով, իսկ պատասխանատւութեան ծանր զգացում՝ բազմաթիւ դժւարութիւններով հանդերձ, ներկայ մարտահրաւէրները դիմագրաւելու եւ յետագային աշխոյժ գործունէութիւն ծաւալելու հեռանկարով:

60-ամեայ յոբելեանը կարեւորւել եւ խորհրդանշական բնոյթ է ստացել, քանզի այն նշում ենք մեր ժողովրդի դէմ իրագործւած յանցագործութեան՝ Հայոց Ցեղասպանութեան 100-ամեակին: Այս իրողութիւնը նոր լիցք եւ թափ է հաղորդելու «Արարատ» միութեան մեծ ընտանիքի անդամներին աւելի քան երբեք հետեւողականութիւն դրսեւորելու ցեղասպանութեան բոլոր հետեւանքների դէմ՝ պայքարի ուղղութեամբ:

60-ամեայ յոբելեանը առաւել արժեւորելու եւ պատշաճօրէն նշելու նպատակով, ժամանակին կեանքի է կոչւել յոբելենական յանձնախումբ, որը մշակել է համապատասխան ծրագիր, որի մանրամասնութիւնները ձեզ կը փոխանցենք յաջորդիւ:

Հետեւաբար կոչ ենք ուղղում իրանահայ ազգային մարմիններին եւ միութիւններին աշխոյժ մասնակցութեամբ նպաստել նախատեսւած ծրագրերի իրագործմանը: